II. Euskal Diasporaren Eguna ospatu zuten atzo Ispasterren. Iñigo Urkullu Lehendakaria eta bere gobernuko sailburuak egon ziren ekitaldian besteak beste. Musika, dantza eta antzerkiagaz ospatu zuten eguna.
II. Euskal Diasporaren Eguna Ispasterren. Iturria: Irekia II. Euskal Diasporaren Eguna ospatu zuten atzo [irailak 8], Ispasterren. 12:00etan hasi ziren ospakizunak, antzerkia, musika eta dantza tarteko, eta Iñigo Urkullu lehendakaria ere ekitaldian egon zen. Garai jakin batzuk gogora ekarri zituen lehendakariak, Euskal Herria kanpoaldera irten izan den garaiak, hain zuzen.
Euskal diasporaren lana aintzatetsi zuen lehendakariak, “gure kultura, tradizioak eta hizkuntza belaunaldiz belaunaldi iraunarazten Euskaditik mila kilometrotara”. Lehendakariaren iritziz, kolektibo horrek “aberastu egiten gaitu orain eta bide bat urratzen laguntzen digu mundura gero eta gehiago zabaltzen ari den etorkizun baterantz”. Eta Euskadiren izaera migratzailea kontuan hartuta, beste herrialde batzuek etorkizun hobeago baten bila egindako deiaren aurrean ezin dela “beste aldera begiratu” adierazi zuen lehendakariak.
Diasporaren Eguna ospatzeko egin den ekitaldi instituzionalean, lehendakariagaz batera, bere Gobernuko sailburuak Josu Erkoreka, Arantxa Tapia, Iñaki Arriola, Nekane Murga, Maria Jesus San Jose, Estefania Beltran de Heredia, Legebiltzarreko Lehendakaria, Bizkaiko Batzar Nagusiko Lehendakaria, bai eta Marian Elorza Kanpo Harremanetarako Idazkari Nagusia eta Gorka Alvarez Kanpoan den Euskal Komunitatearentzako Zuzendaria ere egon ziren. Bai eta Garbiñe Saenz de Buruaga herriko alkatea eta udal ordezkariak, eta Ispasterko diasporari lotutako pertsonak ere batu ziren ekitaldian.
Harrera herria. Urteen joanean “Euskadik kanpora irteten jarraitzen duela ” nabarmendu zuen lehendakariak, eta euskal komunitateak kanpoaldean egindako lana eskertu zuen, “sustraiak eta Euskadirekiko lotura mantentzearren”. 191 Euskal Etxeen bitartez 25 herrialde baino gehiagotan eratutako sarea “sendoa eta eraginkorra” dela aitatu zuen: “Euskal diaspora sare sendoa eta eraginkorra da, sare sustraitua eta Euskadirekin zubigintza egiten duena. Xede bat partekatzen duen sarea da, Euskadi Basque Country-ren izena eta izana mundu zabalean indartzea”.
Lehendakariak gogoratu zuenez, 16 herrialdetako 60 euskal etxetan antolatu ziren, aldi berean, egun hau ospatzeko ekitaldiak, eta munduan zehar ospatzen diren ekitaldi horiek duela bost mende Joan Sebastian Elkanok munduko itzulia amaitu izanarekin alderatu zituen.
Izaera migratzaile hori aipatu zuen lehendakariak bere diskurtsoan: “Zer izango zen gure diaspora helmugako herrialdeetan atzera bota izan bagintuzte? Orain herri migratzaile bezala dugun historia gogora ekartzen ari bagara arrazoi honengatik da; beste herri batzuk ate joka etorri zaizkigulako etorkizun hobeago baten bila”.
Herritarren eta Lea-Artibaiko bizilagunen parte hartze zabalagaz egindako dantza, antzerki eta musika ikuskizunez gain, Euskal diasporari buruzko erakusketa bat ere inauguratu zuten ospakizuneko ekitaldien baitan. Hamabost egunez egongo da zabalik, eskolako umeek ere Euskal Herriko eta herriko historia ezagutzeko aukera eduki dezaten.
[Argazkien iturria: Irekia]
