Saia Goait talde mutrikuarrak lehen diskoa aurkeztuko du barikuan, Beheko Plazan
Urtebeteko lanaren ostean, talde mutrikuarrak taldearen izen bera daraman lehenengo diskoa aurkezteko kontzertua eskainiko du barikuan, 23:30ean, Mutrikuko Beheko Plazan. Disko freskoa dela esan dute taldeko kideek.
Saia Goait taldeko kideak. Argazkia: Begipuntuan. Musikazale amorratuak dira. Urteetan musikagaz gozatu eta musika egin dutenak. Orain, esfortzu eta mimo handiz egindako lehenengo diskoa argitaratu dute, eta taldearen izen bera ipini diote: Saia Goait. Diskoa non aurkeztu ere argi-argi zeukaten hasieratik. “Mutrikuarrak gara, eta argi geneukan diskoa ere herrian aurkeztuko genuela, horrek ilusioa egiten digu. Herritik hasiko gara beraz”. Hitzordua barikuan [irailak 13] ipini dute, Galbaixotako danborrada eta gero, 23:30ean, Beheko Plazan.
Urtebetez egon dira burubelarri diskoan lanean, eta ekainean Mutrikuko AME estudioan sartu ziren grabatzera. “Diskoa grabatu ahal izateko dirua batzeko jai bat egin genuen martxoaren 1ean Mutrikuko Gaztetxean, Vult taldearekin batera. Horrez gain, udalari eskatu genion jaietan ere tartetxo bat uzteko, dirua lortzeko. Eta autogestioari eta udalaren laguntzari esker, diskoa grabatu dugu”.
Eurek egindako sei abestigaz osatu dute diskoa, baina gehiago dutela esan dute. “Diskoan, baina, sei sartu ditugu. Motza eta freskoa izatea nahi genuen, eta emaitzarekin gustura geratu gara”. Taldekideak eurak gustura geratzeaz gain, inguruko batzuek ere diskoa osorik entzun dutela eta haiei ere gustatu zaiela esan dute. “Rock gogorraren barruan, askotariko abestiak batu ditugu. Bilatu nahi genuen soinua lortu dugu”.
Barikuko kontzertuan, hain zuzen ere, diskoko abestiez gain euren beste abesti batzuk ere eskainiko dituztela esan dute. “Ordu eta erdi inguruko kontzertua izango da”.
Diskoa aurkeztu eta gero, kontzertuak lotzen jarraituko dutela esan dute. “Durangoko Azokan ere egongo da diskoa”. Beraz, Saia Goait han eta hemen ikusteko aukera egongo da. Urrutira joan gabe, azaroan SA taldearekin ariko dira, Azpeitian. Eta atzetik etorriko dira beste kontzertu asko eta asko. “Bira bat prestatuko dugu”.
Taldeko kideak: Denis Alberdi (bateria), Beñat Perales (ahotsa), Jon Antxustegi (baxua) eta Aitzol Urkiza (gitarra eta ahotsa).
