48 ontzik jokatu dute Lekeitioko VII. Dzanga Itsas Kayak Txapelketa
Gizonezko seniorretan lehenengo postua Xabier Ruiz de Aretxabaletarentzat izan da (Donostia Kayak K.E.) eta emakumeetan Begoña Lazkano (Donostia Kayak K.E.) izan da nagusi.
Guztira 48 ontzik lehiatu zuten atzo [irailak 22] Lekeitioko Dzanga piragua taldeak antolatutako VII. Dzanga Itsas Kayak Txapelketa. Elantxobetik Lekeitiora arteko 13 kilometroko (7 milia) zeharkaldia egin dute estreineko parte hartzaileek eta aldaketagaz “gustura” agertu zirela adierazi dute antolatzaileek.
Gizonezko seniorretan lehenengo postua Xabier Ruiz de Aretxabaletarentzat izan zen (Donostia Kayak K.E.) , gizonezko 50 urtetik azpikoetan Jose Maria Villagarcia (C.D.Fortuna) izan zen bizkorrena eta gizonezko beterano 50 urtetik gorakoetan Rafael Quevedorentzat (Barrika P.T.) izan zen garaipena. Emakumezko seniorretan, bestalde, Begoña Lazkano (Donostia Kayak K.E.) izan zen nagusi.
Bestalde, Andres Lopezek (Amuitz Outrigger P.K.) OC1 modalitatean irabazi zuen, Pedro Pablo Madrid eta Antonio Alonso (C.P. Antares) gizonezko K-2 modalitateko bizkorrenak izan ziren eta Lukas Gustavo Diarte (Amuitz Outrigger P.K.) gizonezko kadeteetan lehenengoa.
Dzanga piragua taldeko Jon Elordik bakarrik parte hartu zuen piragua tradizionalen modalitatean. 10 minutu aurretik eman zioten irteera Elantxoben, atzean ez gelditzeko eta proba bikaina gauzatu zuen lekeitiarrak. “Piragua tradizionalak lehiaketetatik desagertzen ari dira; pisu gehiago dute besteek baino eta gero eta gutxiagok parte hartzen dute txapelketetan”.
Kluben sailkapenari dagokionez, garaipena Barrika P.T.ak eskuratu zuen, bigarren Amuitz Outrigger P.K. eta hirugarrena Pasaia Kayak 2005 K.K geratu ziren.
VII. Dzanga Itsas-Kayak Txapelketagaz gainera, 2019ko Bizkaiko Itsas-Kayak Txapelketa ere lehiatu zuten, aldi berean, parte hartzaileek. Sprinter K1 gizonezko seniorretako irabazlea Barrikako Mikel Lauzirika izan zen, talde bereko Eneko Lopezek lortu zuen bigarren postua eta hirugarrena Plentziako Andoni Intxaurtietak. Beteranoen mailan, aldiz, Barrikako Rafael Quebedok eskuratu zuen lehen postua eta Plentziako Rafa Ocerin eta Jose Domingo Prieto geratu ziren bigarren eta hirugarren, hurrenez hurren.
Pozik. Eguraldia zela eta, azken orduko bajak eduki bazituzten ere, txapelketagaz oso pozik geratu dira Dzanga piragua taldekoak. “Eguraldi txarra iragarrita zegoenez, batzuk huts egin dute, baina bestela dena oso ondo irten da”.
Itsasoa bare egon zen, hori dela eta, parte hartzaileentzat zeharkaldi gogorra izan zela jakitera eman dute Dzangakoek. “Haizerik ez zegoen eta olatua gutxi, beraz, lan handia egin behar izan zuten partaideek. Hala ere, zeharkaldia gustatu zitzaien, inguruneak ere politak zirela esan ziguten”.
Parte hartzaile guztiak Lekeitiora heldutakoan egin zuten sari banaketa, eta hamaiketakoa ere eduki zuten parte hartzaileek indarrak berritzeko.