Kirol proba oso ondo joan zela azaldu dute antolatzaileek. Bi ibilbide egon ziren aukeran.
83 txirrindularik parte hartu zuten Etxebarriko Txik-Txak Kirol Elkarteak antolatuta domekan [urriak 6] Etxebarriko mendietan zehar egin zuten Etxebarriko VI. BTT Martxan. Kirol proba oso ondo joan zela azaldu dute antolatzaileek.
09:00 etan hasi zuten ibilbidea bi ibilbideetako parte hartzaileek –35 kilometroko ibilbide luzea eta 27 kilometroko motza–, eta eguerdirako denak zeuden Etxebarriko Plazabarrin. Bertan eduki zuten, amaieran, indarrak berritzeko jan-edana.
Etxebarriko VI. BTT Martxako parte hartzaileak ibilbidean zehar. Argazkia: Txik-Txak Kirol Elkartea
Bizikletak garbitu eta dutxa hartuta, zozketa egin zuten antolatzaileek, laguntzaileek emandako produktu eta opariekin. Guztira 50 oparitik gora banatu zituzten: 12 cava botila, 12 botila sagardo, 6 botila txakolin, Leaktibai Abentura bonua, 29″ ko hiru gurpil azal, 4 multi-erreminta, balazta pastillak, afari bi lagunentzat, gau bat Antsotegi hotelean eta Orbeak emandako oparia.
Azken oparia banatzeagaz batera, euri tantak hasi ziren eta amaitutzat eman zuten BTT martxa. “Denok pozik, inork minik hartu ez zuelako eta kirolariak ondo pasatu zutelako”, azpimarratu dute Txik-Txak elkartekoek.
Etxebarriko VI. BTT Martxako parte hartzaileak amaieran sariak hartzen. Argazkia: Txik-Txak Kirol Elkartea