Markina-Xemeingo Udal Musika Eskola inauguratuko dute
Herritarrek eraikina barrutik ikusteko aukera izango dute, bertatik ibilbide musikatua eginez, eta bisiten ostean luntxa eskainiko da. Hiru txanda egongo dira.
Xemeingo udaletxe zaharra Udal Musika Eskola izateko berrituta. Argazkia: Markina-Xemeingo Udala Lan guztiak amaituta, barikuan [urriak 18] inauguratuko da Markina-Xemeingo Udal Musika Eskolaren egoitza berria. Arretxinagan dagoen Xemeingo udaletxe zaharra izandako eraikinak hartuko du hemendik aurrera eskola berria, eta espazioa ezagutzeko ate ireki musikatuak egingo dira egun horretan.
Nahi duten herritar guztiek parte hartu dezakete bisitetan. Hiru txanda egongo dira horretarako: 19:00etan, 19:30ean eta 20:00etan. Markina-Xemeingo Udalak jakitera eman duenez, parte hartzen duten herritarrek eraikina barrutik ikusteko aukera izango dute, bertatik ibilbide musikatua eginez, eta bisiten ostean luntxa eskainiko da.
Xemeingo udaletxe zaharra izandako eraikina eraberritzeko lanak 2016an hasi zituen Markina- Xemeingo Udalak. Ordutik, erakina erabat berritu dute: teilatua konpondu, igogailua ezarri eta aerotermia eta domotika sistema ipini dituzte, besteak beste. “Gorengo solairuan espazio zabal bat eratu da, erabilera anitzetarako aproposa izan daitekeena, hala nola kontzertu eta hitzaldiak eskaintzeko. Beheko solairuan bi gela, biltegia eta sukaldea ditu eraikinak. Azken hau herriko talde eta elkarteek erabili ahal izango dute”, azaldu dute.
Horrez gain, eraikinaren kanpoaldean komun publiko bat egin dela nabarmendu du udalak, eta herriko beste komun publikoen ordutegi berean zabalik egongo dela jakitera eman dute. Guztira, 1.059.202,28 euroko inbertsioa suposatu du Udal Musika Eskolaren eraberritzeak. Hortik, udalak beregain hartu behar izan duen kopurua 847.658,16 eurokoa izan da, hau da, inbertsioaren %80,03. Gainontzekoa diru-laguntzen bidez bideratu dela zehaztu dute.
“Lanak amaituta, azken bi urteetan Zeharkaleko udaletxe zaharrean kokatu den Udal Musika Eskola bertara lekualdatu da, eraikinaren lehenengo solairura. Hain zuzen, Berriatuko Tarine Musika Eskola da klaseak ematen dituena, Markina-Xemeingo Udalarekin sinatutako hitzarmenari esker”. Zehaztu dutenez, gaur egun, 125 ikasle ditu eskolak, horien artean batzuk materia bat baino gehiagotan matrikulatuta, eta guztira 187ra heltzen da matrikulazio kopurua. Irakasle kopuruari dagokionez, 13 irakasle ari dira lanean, horietako bost markina-xemeindarrak.
