Ur eskasiari aurre egiteko zenbait neurri hartu ditu Ondarroako Udalak
Ur eskasia dela eta, ura behar denean eta ganoraz erabiltzeko abisua zabaldu du bando bidez udalak. Momentuz ez dute ur mozketarik egingo, baina ahalegin berezia egiteko eskatu diete herritarrei.
Lea-Artibaiko arroetan ur gutxi dagoela jakitera eman du Bilbao Bizkai Ur Partzuergoak. Txosten baten bidez eskualdeko arroek daukaten ur emaria nahikoa urria dela azpimarratu du erakundeak, eta ur gutxi dagoenez, hainbat neurri hartu beharko direla jakitera eman du. Hori dela eta, ur falta saihesteko eta ingurumenagaz zentzuz jokatzeko, Ondarroako Udalak behin-behineko hainbat neurri hartuko dituela adierazi du.
Zunbeltz Bedialauneta Ibaibarriaga alkateak eta ingurumen batzordeburuak nabarmendu dutenez, arroetan ur eskasia egotea benetako arazoa da. “Guztion ardura da planeta zaintzea. Konpromisoak hartzeko garaia dugu herritarrok, bestela, apurka-apurka gero eta gehiagotan egongo gara halako egoeren aurrean”.
Ur eskasia dela eta, ura behar denean eta ganoraz erabiltzeko abisua zabaldu du bando bidez udalak. Momentuz ez dute ur mozketarik egingo, baina ahalegin berezia egiteko eskatu diete herritarrei. Uraren erabilera eraginkorra eta edatetako ura aurrezteko hartuko diren neurrien artean, herriko iturri batzuk aldi baterako itxi egingo dituzte. Parkeak eta lorategiak gutxiago ureztatuko dituzte, eta kaleak ere gutxiago garbituko dituzte baldekin.
Horrez gain, eta beti ere Ur Partzuegoak esandakoari jarraituz, zenbait kasutan uraren erabilera ere debekatu egingo dute. Egoera hobetu bitartean, eta ur kontsumoa murriztezko, besteak beste, ibilgailuen eta eremu edo plaza pribatuen ur bidezko garbiketa galarazota egongo da.
Ura ahalik eta gutxien erabiltzeko nahiagaz, Ondarroako Udalak aholkuak eta gomendioak eman nahi izan dizkie herritarrei. Hain zuzen ere, ura arduraz erabiltzeko eskatu dute; ez alferrik gastatzeko, eta beharrezkoa ez bada, ez erabiltzeko. Gomendioen artean honakoak zabaldu dituzte: ur hartuneak erregulatzea, bainatu ordez dutxatzea, komuna behar den modura erabiltzea, beste jarduera batzuk egin bitartean ur iturria itxita edukitzea edo etxetresna elektrikoak karga osoan eta programa eraginkorretan erabiltzea.
