Ur Patzuergoak uraren kontsumoa murriztea gomendatu die eskualdeko zortzi udalerriri
Azken hilabeteetako euri faltak eraginda, ur hornidura iturri nagusia den Artibai ibaia "aurre-alerta mailan dago, 295 l/s-ko emariarekin".
Artibai ibaia, Markina-Xemeinen. Artibai ibaiaren ur-maila baxua dela eta, Bilbao Bizkaia Ur Patzuergoak Lea-Artibaiko uraren kontsumoa murriztea eta mugatzea gomendatu die eskualdeko zortzi udalerriri.
Erakundeak azaldu duenez, azken hilabeteetako euri falta egon da, eta ondorioz, eskualdea urez hornitzen duen iturri nagusia, Artibai ibaia, “aurre-alerta mailan dago, 295 l/s-ko emariarekin”. Egoerari aurre egiteko, protokolo bat jarri du martxan Ur Patzuergoak, eta Markina-Xemein, Etxebarria, Aulesti, Amoroto, Ondarroa, Berriatua, Munitibar eta Ziortza-Bolibarko udalei, besteak beste, “kaleen garbiketari eta lorategien ureztapenari” dagokien neurriak hartzea eskatu die.
Horrez gain, erakundeak ondoko jarduerak debekatzeko eskaria ere egin die zortzi udalei: igerilekuak betetzea edo ura berriztea, ibilgailuak garbitzea eta patioak, plaza txikiak eta antzeko espazio pribatuak garbitzea. Eskualdea 17.000 biztanle inguruk osatzen dute, eta denei ” erantzukizunez jokatzeko” dei egin die, eremu pribatuetan ura zentzuz erabil” dezaten.
Adibidez, Ondarroako udalak behin-behineko neurriak ezarriko dituela adierazi du. Momentuz, ez dute ur mozketarik egingo, baina herriko iturri batzuk aldi baterako itxiko dituzte. Udalak aholkuak eta gomendioak eman nahi izan dizkie herritarrei: ur hartuneak erregulatzea, bainatu ordez dutxatzea, komuna behar den modura erabiltzea, beste jarduera batzuk egin bitartean ur iturria itxita edukitzea edo etxetresna elektrikoak karga osoan eta programa eraginkorretan erabiltzea
Ibaiaren garrantzia. Bilbao Bizkaia Ur Patzuergoak azken hilabeteetan sareen ustiapenean doikuntza lanak egin baditu ere, euria egin eta ibaiaren ur emaria igo arte, kaltetutako udalei “inplikatzeko” eskatu die, izan ere, “historikoki” Lea-Artibai eskualdea “ibaibide txikien menpe” egon dela gogoratu du erakundeak, baina menpekotasun horri aurre egiteko asmoz, “urteak daramatza zundaketa berrien bidez eskualdeko hornidura osatzeko hartune berriak bilatzeko lanak egiten”.
