Maila gorenera igarotzeko txartelik gabe geratu da Aratz Mugertza aizkolari mutrikuarra
Euskal Herriko Bigarren Mailako Aizkolarien Txapelketa seigarren postuan amaitu du Mugertza III.ak. Horrenbestez, datorren denboraldian lehen mailan jokatzeko aukerarik gabe geratu da.
Aratz Mugertza, txapelketa amaitu ondoren. Argazkia: Ibon Errazu Altsasuko Barrundia pilotalekuan jokatu zuten zapatuan [urriak 19] Euskal Herriko Bigarren Mailako Aizkolarien Txapelketa. Eta bertan indarrak neurtu zituzten sei aizkolarien artean izan zen Aratz Mugertza Mendizabal aizkolari mutrikuarra. Zapatuko norgehiagoka, gainera, ez zen edozelako finala izan. Hain zuzen ere, lehen bi sailkatuek datorren denboraldian maila nagusian aritzeko txartela lortu zuten.
Lanak seigarren postuan amaituta, Olazko aizkolaria lehen mailan jokatzeko aukerarik gabe geratu da. Ez zuen egun ona eduki. Ez zuen asmatu, eta enbor pare batean adarrak agertuta, denbora asko galdu zuen. 26 minutu eta 47 segundotan moztu zituen sei enborrak.
Finalean aritu ziren sei aizkolariek seina pago enbor moztu behar izan zituzten; bina kanaerdiko, bina 60 ontzako eta bina oinbiko, hain zuzen. Finalistak nor baino nor azkarrago ibili ziren lanean, baina azkenean, Jon Irazu Ugaldek jantzi du txapela.
Barrundia pilotalekura hurbildu ziren zaleek final ikusgarria ikusteko aukera eduki zuten. Jon Irazu eta Juan Jose Lopez Azpilikueta lehen bi sailkatuen artean oso lehia estua egon zen. Segundo gutxiren barruan amaitu zituzten lanak. Aurtengo txapeldunak 20 minutu eta 54 behar izan zituen lanak amaitzeko. Txapeldunordeak, berriz, 3 segundo gehiago behar izan zituen. Lortutako emaitza onari esker, biak ala biak lehen mailan ariko dira datorren denboraldian.
Hurrengo hiru sailkatuak ere nahikoa berdinduta ibili ziren. Eloy Corcherok 23 minutu eta 26 behar izan zituen lanak amaitzeko. Josean Etxeberria laugarren sailkatu zen (23.29) eta Arkaitz Jauregi (23.51) bosgarren.
