Pentsiodunen mozioa onartu du Ondarroako Udalak
EH Bilduren aldeko botoekin eta EAJren abstentzioarekin onartu da mozioa.
Ondarroako pentsiodunek mozioa aurkeztu zuten martitzenean [urriak 22], osoko bilkuran. Pentsiodunen elkarteko ordezkariek mozioa aho batez onartzea eskatu zuten, “astelehenero Alamedan batzen diren 275 pentsiodunengatik, eta balio sinboliko handia edukiko lukeelako”. EH Bilduren aldeko botoekin eta EAJren abstentzioarekin onartu da mozioa.
Pentsiodunen elkarteko kideak mozioari buruzko azalpenak ematen. Argazkia: Ondarroako Udala
Beraien eskaerak babesteko eskatu zioten udalbatzari, bai ahokularitzan eta baita mobilizazioetan ere. Zunbeltz Bedialauneta alkateak babes osoa erakutsi dio kolektiboari, eta orain arte egin modura, astelehenero egiten duten elkarretaratzeagaz bat egiten jarraituko duela adierazi du. Maria Dolores Etxano jeltzaleen ordezkariak, aldiz, mozioarekin “erdizka” datozela bat esan du, eta hortik etorri dela abstentzioa. “Argi dago Toledoko ituna berrikusi behar dela, eta gu horren alde gaude”. Pentsioniodunei gizarte eta aholkularitza alorretan udal zerbitzuak eskaintzea eskatu dio udal gobernuari.
