Baserriz baserri, herria ezagutuko dute etxebarritarrek
Mendi martxa antolatu du domekarako Etx kultur elkarteak. Parte hartzaileak Galartza auzoan zehar ibiliko dira.
Etxebarriko Plazabarri. Baserriz baserri igaroko den mendi martxa antolatu du Etx kultur elkarteak domekarako [urriak 27]. Herriko auzo bat eta bertako baserriak ezagutzea dute helburua. Diotenez, herrigunean bizi direnek ez dituzte herriko baserriak ezagutzen, “ez dakigu zein izen daukaten ere”. Hori dela eta, martxa bat antolatu dute, eta ekintza urtero errepikatzeko asmoa daukate, “herriko auzo guztietatik igaro arte”.
Domekako martxa Galartza auzoan zehar egingo da, eta parte hartu nahi dutenek 09:30erako egon beharko dute Plazabarrin. Ordu horretan abiatuko dira guztiak herriko auzoa eta bertako baserriak ezagutzera. Ibilbidea erraza izango dela aurreratu dute antolatzaileek eta bi ordu eta erdi inguruan amaitzea espero dute. Amaieran, indarrak berreskuratzeko kopaua edukiko dute parte hartzaileek.
