Perretxiko Jardunaldiak Lekeition, Aittitta Txikiren eskutik
Perretxikoen inguruko 28. hitzordua antolatu dute astebururako. Perretxikoen argazki erakusketa eta perretxiko erakusketa egongo dira.
Lekeitioko Aittitta Txiki elkarteak antolatutako Perretxiko Jardunaldia. Urtero modura, Perretxiko Jardunaldiak antolatu ditu Lekeitioko Aittitta Txiki kultur taldeak. Perretxikoen inguruko 28. hitzordua izango da aurtengoa, eta ohi modura, perretxikoak ikusi, hobeto ezagutu eta dastatzeko aukera ere eskainiko dute. Hiru ekintza prestatu dituzte horretarako: perretxiko bilketa, argazki erakusketa eta perretxiko erakusketa.
Elkarteko kideak perretxikoak batzen ari dira, eta herritarrei ere perretxikoak jaso eta eramatera animatu dituzte; biltzen dutena, gero, Eskolapeko erakusketa aretora eraman beharko dute gaurtik [urriak 24] zapatura [urriak 26] bitartean. Herritarrek ekartzen dituzten perretxikoak mikologo batek sailkatuko ditu, eta domekan [urriak 27] Uribarren Abaroa egoitzan jarriko duten erakusketan ipiniko dituzte ikusgai. Perretxiko erakusketa 11:00etatik 14;00etara egongo da ikusgai. Pintxoak ere egongo direla gaineratu dute.
Perretxiko bilketa egin bitartean, gaurtik zapatura, Perretxiko Argazki Erakusketa ere egongo da , 18:00etatik 19:30era, Eskolapeko erakusketa aretoan.
