Neska Gazteen Txokoa inauguratuko dute Ondarroan
Aurkezpena barikuan [azaroak 8] izango da, 18:00etan, Etxelilan.
Ondarroako Jabekuntza Eskoletan sortutako Neska Gazteen Txokoa parte hartze gunea inauguratuko dute barikuan [azaroak 8], 18:00etan, Ondarroako Etxelilan.
Irina Alkorta Bedialauneta Ondarroako Berdintasun zinegotziak esan duenez, «herri feminista baten bidean oso garrantzitsua da herriko neska gazteek euren burua pertsonalki eta kolektiboki maitatzeko espazioak edukitzea eta feminismoan eta feminismoz haztea». Bide beretik, herriko neska gazteak espazio horretan parte hartzera gonbidatu ditu, «Ondarroa feminismotik eraikitzen jarraitzeko».
Gunearen sorreraren zergatia ere azalduko dute aurkezpenean. «Ditugun zalantzak eta kezkak partekatzeko espazio baten falta sumatzen genuen. Zenbait problematikari buruz gehiago jakin nahi genuke. Geure burua, pertsonalki eta kolektiboki, maitatzeko espazioak ireki nahi ditugu. Feminismoan eta feminismoaz hazteko gogoz gaude. Gazte eta neska gara, egoera batzuez nazkatuta gaude eta horien aurrean zerbait egiteko gogoa sentitzen dugu, baina ez dakigu horiek guztiak zelan aurrera eraman».
Gunea, hain zuzen ere, hutsune horiek guztiak betetzera datorrela diote. «Feminismoa ezagutzeko, parte hartzeko eta geure ekintza propioak eraikitzeko espazioa izango da. Bazatoz zu ere?».
Espazioa dinamizatzen Miren Larrea Murgoitio Ondarroako Hezkidetza Egitasmoko kide ondarrutarra ariko da.
