Saia Goait taldeak diskoaren aurkezpen bira hasiko du barikuan
Bergarako Gaztetxean eskainiko dute birako lehen kontzertua, eta zapatuan Azpeitian ariko dira, SA taldearekin batera.
Saia Goait taldeko kideak. Argazkia: Begipuntuan. Saia Goait talde mutrikuarrak lehenengo diskoaren aurkezpen bira hasiko du barikuan [azaroak 8], 22:30ean, Bergarako Gaztetxean. Lehenengo bira honetan bost kontzertu eskainiko dituztela esan dute.
Urtebete «burubelarri» lanean ibili eta gero atera zuten taldearen izen bera daraman diskoa; rock gogorraren barruan, askotariko abestiak biltzen ditu diskoak. Lehendabizi herrian bertan aurkeztu zuten, Galbaixo jaietan, danborrada eta gero Beheko Plazan eskainitako kontzertuan. Ostean Ondarroan aurkeztu zuten, Marabilli Sormen Festibalaren barruan. Orain, Euskal Herriko hainbat txoko zeharkatuko dituzte.
Aurkezpen kontzertuen artean zapatuan [azaroak 9] Azpeitian eskainiko dutena azpimarratu dute taldeko kideek. «Azpeitira mutrikuar asko hurbildu dira gu ikustera. Kontzertua bera ere erakargarria da, Soziedad Alkoholika bezalako talde ospetsu baten aurretik joko dugulako».
EGUTEGIA:
- Barikua [azaroak 8]. Bergarako Gaztetxean, 22:30ean, Hartz taldearekin batera.
- Zapatua [azaroak 9]. Azpeitiko San Agustin kulturgunean, 22:30ean, Soziedad Alkoholikarekin.
- Abenduak 6. Sopelako Plaza Beltza kulturgunean.
- Abenduak 7. Durangoko Azokan, Ahotsenea kontzertu gunean.
- Otsailak 28. Iruñeako Infernu tabernan.
