Maila nagusiko 11 gizonezkok Ondarroako Arraun Elkartea utzi dute
Zazpi arraunlari Kaikuk, Donostiak, Oriok eta Urdaibaik fitxatu dituzte. Beste laurek arrauna behin-behinean uztea erabaki dute. Ordezko bila hasita dago Iñaki Errasti.
'Antiguako Ama' traineruko arraunlariak. Argazkia: Ondarroako Kirolaren Leihoa Merezitako atsedenaldia hartu ondoren, traineru denboraldia prestatzen hasi da Ondarroa Arraun Elkarteko gizonezkoen taldea. Iñaki Errasti entrenatzaileak jakitera eman duenez, 11 arraunlari gutxiagogaz hasi du lehen entrenamendu saioa.
Aginagako entrenatzaileak nabarmendu duenez, espero zuen batek edo bestek taldea uztea, baina ez hainbestek. Zazpi beste talde batzuk fitxatu dituzte. Zehatz esanda, Kaikura, Donostiara eta Oriora bina lagun joan dira, eta beste bat Urdaibaira. “Ondarroa diru aldetik ailegatzen da ailegatzen den tokiraino, eta guk horren aurka ezin dugu ezer egin”. Beste lau arraunlarik arrauna uztea erabaki dute behin-behinean, arrazoi pertsonalengatik. «Kirol hau oso sakrifikatua da, eta norbere bizimoduagaz bateratzea ez da batere erraza”.
Hutsune handiagaz hasi dute denboraldi-aurrea, eta zoritxarrez, ez dago harrobitik bertatik jendea hartzeko aukerarik. Antiguako Ama-ren entrenatzailea, baina, ordezko bila ere hasita dago. Getariako Iker Eizmendi eta Erik Aranburu fitxatu ditu, eta garai batean San Pedron ibilitako Mikel Lasa eta iaz Kaikun ibili zen Eneko Zabala ere Errastiren agindutara ibiliko dira hurrengo denboraldian. Azken bi urteotan arrauna utzita egon ostean, Aner Agirre harrobiko arraunlaria ere bueltatuko da trainerura. “Arrauna probatu duten beste bi mutil ere etorri dira Mutrikutik”.
Geratu diren taldekideak eta gehitu berri direnak kontuan hartuta, hamasei lagunekin hasi da gizonezkoen taldea denboraldi berria prestatzen. Trainerua uretaratzeko nahikoa arraunlari baditu ere, gehiagoren laguntza ongietorria izango dela ere azpimarratu du. “Ateak denentzako zabalik ditugu”. Interesa dutenek klubera hurreratu besterik ez dute izango.
Duela bi urte Ondarroaren ardura hartu zuenean hamahiru lagunek utzi zuten taldea, eta oraingoan ere egoerari aurre egingo diolakoan dago aginagarra. “Garai hartan orain baino okerrago nengoen. Urte hori nire estreinako urtea zen; taldea ez nuen ezagutzen, eta hainbeste arraunlari erakarri behar izan genituen”.
