Zabalik dago Mutrikuko Herri Kroserako izen ematea
Talaixa Triatloi Klubak antolatuta, azaroaren 16an lehiatuko dute Mutrikuko XVII. Herri Krosa.
Nora Narbaiza eta David Garcia irabazleak 10 kilometroko proba 16:30ean hasiko da, eta antolatzaileek jakitera eman dutenez, izen ematea zabalik dago Herrikrosaren webgunean. Gogorarazi dutenez, aurretik izena eman nahi dutenek 12 euro ordaindu beharko dituzte, eta zozketa batean parte hartzeko aukera ere edukiko dute. Bertan egunean ere egongo da izena emateko aukera, baina kasu horretan 15 euro ordaindu beharko dituzte korrikalariek.
Proba hasi aurretik, bestalde, herriko gaztetxoek ere saltaka ibiltzeko aukera edukiko dute. Talaixakoek Kros Txikia antolatu dute Lehen Hezkuntzakoentzat, bi probatan banatuta. Bateko zein besteko probetan izena eman nahi duten LH3tik 6rako ikasleek Eskola Kirolaren bidez eman ahalko dute izena, doan, mutrikukoeskolakirola@gmail.com helbide elektronikora idatzita. Herritarrak ez direnek ere parte hartzeko aukera edukiko dute, horretarako antolatzaileekin harremanetan jartzea nahikoa izango da.
