Bere errekorra hautsi du Ager Solabarrieta ondarrutarrak
Logroñoko Vino Rioja Master 100 21. Nazioarteko Irekia irabazteaz gain, 578 puntutan ezarri du errekor berria. Datorren astean Espainiako Txapelketaren finala jokatuko du ondarrutarrak, Maite Badiola laguntzaileagaz batera
Ager Solabarrieta Logronoko txapelketan parte hartzen. Argazkia: Maite Badiola Ager Solabarrieta Txakartegi Ondarroako tiratzaile olinpikoak orain arteko mailarik onena erakutsi du Logroñoko Vino de Rioja Master 100 21. Nazioarteko Irekian. Kirol egokituan aritzen den ondarrutarrak, hain zuzen ere, orain arte ezarrita zuen karabinako jomuga errekorra gainditu berri du, eta txapelketa irabazteaz gain, bere errekor pertsonala 24 puntutan hobetzea lortu du euskarri gabeko 60 tiro zutikako kategorian. Ondarrutarrak 578 puntu lortu zituen domekan [azaroak 10].
Ondarrutarra oso gustura bueltatu da Errioxako hiriburutik, eta oraindik ere ezin sinetsita dagoela nabarmendu du. “Entrenatzen oso ondo ibili naiz, baina ez nuen hainbesteko emaitza onik edukitzea espero. Nabarmen hobetu dut errekorra, eta egindako ahalegina igarri da behintzat. Txapelketara begira oso kontzentratuta eta oso gustura bota nuen. Egun borobila eduki nuen: 9 eta 10eko tiro asko egin nituen, eta 8ko gutxi batzuk. Zorionez, 6 eta 7ko batik ez nuen egin”.
Datorren astean, berriz, Espainiako Txapelketaren finalean lehiatuko da azaroaren 23an eta 24an, Logroñon. Ohi modura, Maite Badiola laguntzaileagaz batera Espainiako urrearen bila aterako da euskarri gabeko 60 tiro zutikako kategorian eta euskarri gabe 60 tiro etzundakoan. Aurretik hiru sailkapen fase gainditu ditu ondarrutarrak, eta azken errekorra hautsi ostean, finalera asmo onekin eta oso motibatuta doala aurreratu du. “Koaxe onagaz noa, eta horretarako gogor entrenatzen jarraituko dut. Beste lasaitasun bategaz joango naiz txapelketara”.
