EH Bilduk eskuratu ditu boto gehien Lea-Artibain eta Mutrikun
Alde txikiagaz, eta apirileko hauteskundeetan ez modura, oraingoan EH Bildu izan da alderdirik bozkatuena; 7.234 boto eskuratu ditu EH Bilduk eta 6.972 EAJk. Bi alderdien arteko alde handiena Ondarroan egon da; EH Bilduk 497 boto gehiago eskuratu ditu.
Espainiako Gorteetarako hauteskunde orokorretan EH Bildu eta EAJ izan dira bi indarrik bozkatuenak Lea-Artibain eta Mutrikun. Koalizio abertzaleak eskuratu ditu boto gehien, 7.234, eta 6.972 EAJk. Apirileko hauteskundeetan EAJ izan zen nagusi. Alderdi jeltzaleak koalizioak baino 185 boto gehiago eduki zituen orduan. Apirilaren 28an gertatu modura, hirugarren alderdi bozkatuena Elkarrekin Podemos koalizioa izan da.
Emaitzak herrika aztertuta, EH Bildu ondorengo herrietan nagusitu da: Aulesti, Gizaburuaga, Munitibar, Mutriku, Ondarroa eta Ziortza-Bolibar. EAJ Amoroto, Berriatua, Etxebarria, Ispaster, Lekeitio, Markina-Xemein eta Mendexan izan da lehen indarra.
Azpimarratzekoa izan da bi alderdi bozkatuenen arteko aldea oso txikia izan dela Mendexan; EAJk 108 boto eskuratu ditu, EH Bilduk baino bat gehiago. Bi alderdien arteko alderik handiena, berriz, Ondarroan egon da; EH Bilduk 497 boto gehiago eskuratu ditu. Bi alderdien arterko boto tartea, gainera, handitu egin da. Apirilean EH Bilduk jeltzaleek baino 411 boto gehiago eskuratu zituzten, eta orain 497 boto gehiago. Aulestin eta Gizaburuagan datuak alderatuta, EH Bilduk EAJren botoak bikoiztu ditu.
VOX eskuin muturreko alderdiari dagokionez, Espainiako estatuan hirugarren alderdi bozkatuena izan bada ere, Lea-Artibain eta Mutrikun apirilean baino 4 boto gutxiago lortu ditu; 56 denetara: 25 Ondarroan, 9 Mutrikun, 7 Lekeition, launa Berriatuan eta Markina-Xemeinen, 3 Ispasterren, 2 Munitibarren eta bana Etxebarrian eta Mendexan.
