Markina-Xemeingo Master Goxua Txapelketaren final laurdenak lehiatuko dituzte datozen bi asteburuetan

Asteburu honetan bost partidu jokatuko dituzte; 1. mailako bi eta 2. mailako hiru. Finalak urtarrilaren 3an lehiatzea aurreikusi dute.

I Master Goxua Txapelketa

29 bikotek izena eman zuten esku pilota sustatu eta kirol horren inguruko giroa indartzea helburu dituen Master Goxua Txapelketan. Datozen bi asteburuetan final-laurdenak gainditu beharko dituzte pilotariek eta finala urtarrilaren 3an jokatzea aurreikusita daukate.

Asteburu honetan bost partidu lehiatuko dituzte. Zapatuko lehen partidua 16:30ean hasiko dute eta domekako lehenengoa, 10:30ean. Iñaki-Pello eta Varela-Unanue bikoteen artekoa izango da zapatuko lehen lehia, eta jarraian, Lakak eta Ubek Onagoitiaren eta Joanesen kontra jokatuko dute. Domekan, Dani-Zierta eta Peio-Urrutia bikoteen arteko final laurdena izango da lehenengoa. Ondoren, Etxeta-Elu eta Ibon Arriaga-Etxabe bikoteen txanda izango da, eta azkenik, Perran anaiak eta Zubiria Gomez ariko dira zein baino zein gehiago.

Aurreko asteburuko kanporaketan bost partidu jokatu zituzten, eta 1. mailan Berasaluze-Balsera, Urizar-Mendibe eta Iglesias-Romero eta 2. mailan, Katillu-Eriz eta Onagoitia-Joanes bikoteek lortu zuten txapelketan aurrera egitea.

Zapatuan, 1.mailako lehian, Berasaluze eta Balsera 18-17 nagusitu zitzaizkien Atanori eta Gorkari. 2. mailakoan, berriz, 18-12ko emaitzagaz irabazi zieten Katilluk eta Erizek Tubori eta Trontxori. Domekako partiduei dagokioenez, 18-11 amaitu zen Urizar-Mendibe eta Ansotegi-Ansotegi bikoteen arteko 1. mailako partidua. Maila berean, Iglesias eta Romero 18-14 nagusitu ziren Bereikuaren eta Zapateroren kontra. 2. mailakoan, Joanesek eta Onagoitiak 18-12 mendean hartu zituzten Txelo eta Potro.