2020ko aurrekontuak zehaztu aurretik herritarren ekarpenak jasoko ditu udalak
Ekarpen fitxak banatuko dituzte datozen egunotan, eta herritarrek abenduaren 15era arteko epea daukate horiek bete eta aurkezteko. Bestalde, auzo batzarren balorazio positiboa egin dute udal ordezkariek.
Hurrengo urteko aurrekontuak bideratzeko, udalak egin behar dituen proiektu eta inbertsio nagusiei buruzko parte hartze saioa egiten dute urtero. Ze proiektu lehenetsi eta zeintzuk egin eta zeintzuk ez zehazteko baliagarria izaten den batzarra egiten dute herritarrekin. Aurten abenduaren 28an egindo dute, baina aurretik, ekarpenak jasoko dituzte.
Horretarako, datozen egunotan inkestak banatuko dituzte, etxez etxe. Bizilagunek euren proposamenen deskribapen labur bat bete beharko dute orrian. Proposamen horrek zein beharrizani erantzuten dion zehaztu beharko dute, bai eta izatekotan, gairi buruzko beste herrietako erreferentziarik badaukaten ere. Herritarrek abenduaren 15a (domeka) bitartean utzi beharko dituzte auzoetan edo udaletxean dauden udalaren buzoietan.
Parte hartzearen garrantzia. Herritarrak parte hartzera animatu dituzte udal ordezkariek: “Egiten diren proiektu guztiak kudeatzen gaudenon ideietan oinarrituta barik, herri guztiarenetan oinarritutakoak izatea nahi dugu. Guretzat ere errazagoa eta egokiagoa da denen adostasunagaz egitea. Behintzat iparrorratza noruntz doan jakinaren gainean egon nahi dugu”.
Arkaitz Goikoetxea Munitibarko alkateak azaldu duenez, abendu amaierako hitzordurako herritarrek egindako proposamenak aztertuko dituzte. “Aurreko urteetan gertatu izan zaigu baten bat batzarrera proposamen bategaz joatea, eta hori ondo lantzeko astia edota informazioa ez edukitzea. Proposamena egin eta horrek atzetik zeukan balorazioa ekonomikoa egitea oso gaitza zen, momentuan bertan kuantifikatzea ez baita erraza. Aurten hori zelan bideratu pentsatu eta erabaki genuen ekarpenak hamabost bat egun lehenago aurkezteko aukera ematea. Horrela behintzat batzar horretara proposamenak landuta eroango ditugu”. Horrela, 2020ko aurrekontuetarako aurreikuspena egin eta proiektu desberdinak lehenesteko aukera edukiko du udal gobernuak.
Auzo batzarrak. Bestalde, aurreko asteburuan amaitu zituzten auzo batzarren balorazio positiboa egin dute udal arduradunek.
“Iparrorratz hori norabide egokian mantentzen laguntzen digute auzo batzarrek. Auzo bakoitzean ze beharrizan eta gurari dagoen jakinda, errazagoa da norabide egokia edukitzea”, adierazi du alkateak.
Oro har, auzo guztietan Lea Ibarra Udal Mankomunazgotik uztailean martxan jarritako zabor bilketa sistema berriari buruzko ardura daukatela azaldu du alkateak. Sistema hori hobeto zelan jarri daitekeen galdetu diete herritarrek. “Zehaztutako guneak ez dauden lekuetan zelan bideratu daitekeen zaborraren zatikako batzea esan digute. Gaur egungo auzo guztietan ez daude bilketa guneak, eta herritarrak lehengo sistemagaz ohitura daude. Hau da, etxe aurrean edukiontzi bat edukitzera ohituta daude. Aldaketa hori batzuei errazago egin zaie, eta beste batzuentzat ez da hain erosoa. Beraz, hori konpondu beharreko gauza dela ikusi dugu”.
Bestalde, ia auzo guztietan atera den gaia auzo bideen egoera eta mantenimendua izan da: “Arekak nola garbitzen diren, belarrak zelan ebakitzen diren eta abar galdetu ziguten. Sasoi batean auzo bakoitza arduratzen zen bere auzo bidearen mantenimenduagaz. Krisi sasoiaren aurretik diru publikoa zegoenez, bideak hormigoiagaz asfaltatu ziren, eta ordura arteko auzoen ardura hori bertan behera geratu zen. Orain, ostera ere bideak mantentzeko lehen egiten ez zen ahalegin berezia egin behar da udaletatik”.
