Afari merienda herrikoiagaz ospatuko dute San Andres Eguna Etxebarrian
Zapatuan eta domekan ospatuko dituzte jaiak etxebarritarrek. Urteroko ohiturari jarraituta herriko frontoian elkartuko dira.
Etxebarritarrak taloak prestatzen iluntzeko afari-meriendarako. Beste urte batez, azaroari amaiera beroa emango diote etxebarritarrek. Urteroko ohiturari jarraituta herriko frontoian elkartuko dira San Andres eguna [azaroak 30] lagunartean ospatzeko. Ohi modura, jolas eta jokoetarako tartea hartuko dute, eta mahaiaren bueltan amaituko dute eguna, afari gozoagaz.
San Andresak zapatuan jausi dira aurten, eta beraz, mezagaz hasiko dituzte. 11:00etan egongo da elizkizuna San Andres Apostoluaren elizan. Ondoren, buztinagaz eskulanak egiteko aukera edukiko dute herritarrek Rosa Mari Etxaberen eskutik. Etxabek gidatutako ekimena 12:15etan hasiko da; material guztiak prest edukiko ditu frontoian nahi duten guztiek parte hartu dezaten.
Arratsaldean, berriz, jolaserako eta jokorako aukera egongo da. Alde batetik, herri kirol jolasak egongo dira ume eta gaztetxoentzako, eta bestetik, karta jokoan egiteko aukera edukiko dute gazte eta nagusiek. Urtero modura, Briska Txapelketa egongo da herritarrentzat, bi mailatan banatuta: 16 urtetik beherako gazteen mailan eta 16 urtetik gorakoen mailan.
San Andres kartelen lehiaketako sariak ere banatuko dituzte. Ohi bezala, lau mailatan banatuta egon da sariketa. Hurrengoak izan dira irabazleak: Nahia Txurruka Aresti (0-5 urte); Maddi Guenaga Txakartegi (6-9 urte); Nahia Iruguenpagate Arrieta (10-16 urte) eta Arantzazu Ugalde Etxebarria (nagusiak). Horien lanak, aurtengo jaietako egitaraua apaindu dute.
Iluntzeko afari meriendarako talo eta txerrikiak prestatzea dute asmoa. Txistorra, odolostea, urdaiazpikoa eta taloak ez dira faltako, eta horretarako lanean egongo da herritar talde bat arratsaldetik. Kartelen lehiaketako sari banketaren ostean jarriko dira mahaietan herriko ume eta gaztetxoak, eta horien ostean ailegatuko da nagusien txanda.
Ospakizun nagusia zapatukoa izango bada ere, domekan [abenduak 1] Euskara Eguna ospatuko dute jaien egitarauaren baitan. Bota Euskarari gutuna lehiaketako sariak banatuko dituzte hasteko, eta ondoren kopaua egongo da. Arratsaldean berriz, Amets Txurruka Lagunartiek antolatutako ume eta gazteentzako mendi bizikleta zirkuitua egongo da Errekarten. Ume eta gazte, neska eta mutil animatu dituzte 16:00etan hasiko den norgehiagokan parte hartzera. Zirkuitu bat prestatuko dute berdegunean, eta maila ezberdinetan parte hartzeko aukera egongo da.
