Jaiei buruzko batzar zabala antolatu du Berriatuko Jai Batzordeak
Eskolako lanetako barrakoiek orain arte erabiltzen den jai eremua nabarmen txikitzen dutela abiapuntutzat hartuta, Aurten jaiak non eta zelan? batzarra egingo dute abenduaren 4an, 19:00etan, Berriatuko udaletxean.
Berriatuko Jai Batzordeko kideek azaldu dutenez, barrakoiek jai eremua nabarmen txikitu dute, eta arazoak 2020ko San Gregorio jaiei eragingo liekela ikusirik, herritarrekin batzea erabaki dute. “Jendea batuta mantentzeko jaietako ekintza denak udaletxe eta kioskoaren bitartera lekuz aldatzea erabaki genuen orain dela lau urte. Orain, baina, eskolako lanetarako ipini dituzte barrakoiek jaietako eremu handi bat hartzen dute; plaza erdi baino gehiago betetzen dute. Udaletxe aurrean barrakoiak dauden bitartean, paella jana edo azoka ezagutzen ditugun formatuan egiteko ez dago nahikoa lekurik“.
Barrakoiek eragindako leku arazoak jaietako ekintza jendetsuenei eragiten die zuzenean, eta ekintza horiek lekuz aldatzea beharrezkoa izango dela ikusirik, herritarren iritzia ezagutu nahi dute. Barrakoiek eragindako leku arazoa herritarren artean erabaki nahi dutela azpimarratu dute. “Ekintzak nora aldatu ditzakegun erabaki behar dugu. Erabakia ez dugu jai batzordea osatzen dugunon gain egotea nahi bakarrik. Jaiak, azkenean, denontzako dira, eta herritarrek dituzten proposamenak ezagutu nahi ditugu. Batez ere, jaia non egingo den denon artean erabakitzea gustatuko litzaiguke”.
Batzarrean, gainera, jaiei buruzko bestelako ekarpen berriak ere jaso nahi dituztela aurreratu dute. “Herriko nonork ideia berriren bat edo egitarauan aldaketaren bat egin nahi baldin badu ere, gustura entzungo dugu. Jendeak zer nahi duen jakin nahi dugu jendearen ahotik”.
