Emakumezko puntistak Berriatuan batuko dira beste behin
Nesken Nazioarteko Topaketa egingo dute bihartik domekara bitartean, Mendibarrenen. Euren partiduak ikusteko sarrera doakoa izango da.
Iazko topaketa. Argazkia: Xistera. Nesken Nazioarteko Topaketa hartuko du asteburu honetan Berriatuak. Euskal Herriko, Frantziako eta Kataluniako puntistak batuko dira, eta Xistera klubaren arduradunek esan dutenez, kinielak eta partiduak (modu tradizionalean zein jokoetara) jokatuko dituzte.
Bihar 17:00etan hasiko dute topaketa. Zapatuan 11:00etan hasiko dira jokatzen, eta domekan, berriz, 10:00etan.
Sarrera doakoa izango da, eta gaur egun zestan dabiltzan emakumezko gehienak ikusteko parada ederra izango dela azpimarratu dute Xisterako ordezkariek.
Gizonezkoen finalak, Tolosan. Bestalde, Tolosan amaituko dute Mutilen Xistera Zirkuituko hirugarren fasea. Zapatuan [abenduak 7] 11:00etan hasiko da pilota jaialdia, eta Mutilen Xistera Zirkuituko hirugarren faseko finala izateaz gain, Jose Inazio Elolaren Seigarren Memoriala ere izango da.
Hirugarren Mailako finalarekin hasiko da jaialdia. Libois eta San Jose, Arakistainen eta Iriondoren aurka jokatuko dute. “Lau pilotariak oso maila onean heltzen dira jardunaldi honetara”.
Jarraian, Bigarren Mailakoen txanda izango da. Urrutia-Haronordoquy eta Gallletebeitia-Garat bikoteak sailatu ziren finalera, baina, azken orduko aldaketa egon da. Lan arazoengandik, Harinordoquyk ezin izango du jokatu, eta bere ordez Ohyenard zuberotarra arituko da, bera izan baita fase honetako hirugarren atzelaririk onena. Xisteraren ordezkariek zehaztu dutenez, maila honetan “Urrutia ari da ezberdintasunak markatzen” azkenaldian. “Donibane Garaziko aurrelaria ikaragarrizko jokoarekin dago, eta min handia egiten du. Hala ere, Galletebeitiak ez dauka eskarmentu faltarik, eta bi atzelariak ere oso seguruak direla kontuan hartuta, final hau ere oso polita iragartzen da”.
Lehen Mailan, berriz, Antxon eta Uranga, Gaizkaren eta Goixerriren aurka aritu dira zein baino zein gehiago. Finalak “oso dotorea izateko” osagai guztiak dituela azpimarratu dute: “Antxon tartean egon da, seguraski faboritoak eurak izango dira. Uranga ere sasoi betean dago, baina aurrean bikote oso arriskutsua izango dute, Gaizka eta Goixeri une oso onean heltzen baitira final honetara”.
*FINALAK:
- Libois-San Jose / Arakistain-Iriondo (3. maila)
- Urrutia-Ohyenard / Gallatebeitia-Garat (2. maila)
- Antxon-Uranga / Gaizka-Goixerri (1. maila)
