Ondarroako udal zerbitzuak eta Herri Busa martxan egongo dira abenduaren 6an
Espainiako konstituzioaren eguna jai arrotza dela iritzita, bihar [abenduak 6] Ondarroako udaletxeko ateak zabalik egongo direla jakitera eman dute udal ordezkariek.
Azpimarratu dute udal ordezkariak, egunero modura, udaletxean egongo direla herritarrak hartzeko eta ohiko lanak egiteko. Udaletxeak ezeze, Herri Busak ere ohiko zerbitzua eskainiko duela nabarmendu dute. “Eguneroko ordutegia izango du”.
Gaineratu dutenez, azken urteotan zabalik egon dira udaletxeko ateak abenduaren 6an, “Euskal Herrian ez baitago ezer ospatzeko”. Zunbeltz Bedialauneta Ibaibarriaga alkateak adierazi duenez, jai arrotzekin ez dute bat egiten, eta abenduaren 6an ere, urriaren 12an modura ere, lan egingo dute. “Euskaldunon hainbat eskubide zapaltzen dituen konstituzio baten alde ezer ez dago ospatzeko”.
