Pertsona bat atxilotu dute Lekeition, taberna batean lapurretan egiten saiatzea leporatuta
Segurtasun Sailetik argitu dutenez, susmagarria, ustez, Paskual Abaroa etorbideko taberna batean sartzen saiatu da, lapurrretan egiteko asmoz, beste pertsona batek lagunduta.
Paskual Abaroa etorbidea. Ertzaintzako agenteek 28 urteko pertsona bat atxilotu dute gaur [abenduak 5] goizaldean Lekeition indarrez lapurtzen saiatzea eta agintaritzaren agenteei erresistentzia larria egitea leporatuta. Segurtasun Sailetik argitu dutenez, susmagarria, ustez, Paskual Abaroa etorbideko taberna batean sartzen saiatu da, lapurretan egiteko asmoz, beste pertsona batek lagunduta. Ertzaintzaren patruila agertu denean bigarrenak ihes egitea lortu du.
Goizaldeko laurak inguruan abisu bat jaso dutela azaldu du Segurtasun Sailak. Dei horri erantzunez abiatu da Ertzaintzaren patruila bat esandako lekura eta susmagarrietako bat aurkitu dute Paskual Abaroa etorbideko taberna bateko atearen ondoan. “Handik gutxira, beste susmagarria tabernara sartzeko eskailera burutik irten da, eta bi gizonak korrika hasi dira elkarrengandik bananduz”, azaldu dute.
Egoera ikusita, susmagarrietako baten atzetik joan dira ertzainak, eta berehala harrapatu dute. Beste susmagarriak, berriz, ihes egitea lortu du. “Agenteek tabernako atean indarrez irekitzen saiatu izanaren aztarnak aurkitu dituzte, baina argi zegoen ez dutela barrura sartzea lortu”. Era berean, hurbil dagoen beste denda bateko ateak ere kalte berberak zituela nabaritu dute, eta beraz, agian denda horretan ere sartzen saiatu direla uste du Ertzaintzak, baina ez dutela lortu.
Horregatik guztiagatik, ertzainek susmagarria identifikatu eta beharrezko egiaztapenak egin ondoren, atxilotu eta ertzain-etxera eraman dute.
