Zabalik dago Beteranoen Trinketeko Txapelketan parte hartzeko aukera
2020ko Trinketeko Esku Pilota Txapelketa abiarazi du Akarregi pilota taldeak. XV. txapelketa izango da datorren urtekoa. 40 urtetik gora dituzten inguruetako pilotari guztiak animatu dituzte parte hartzera.
2019ko txapeldunak Iñaki Astigarraga eta Iban Gandiaga. Argazkia: Akarregi pilota taldea 2020an ere martxan egongo da Lekeitioko Akarregi pilota taldeak udalaren laguntzagaz antolatzen duen Beteranoen Trinketeko Esku Pilota Txapelketa. Pilotari helduen parte hartzea bultzatu asmoz antolatuko duten hamabosgarren txapelketa izango da datorren urtekoa, eta urtero modura, deialdia 40 urtetik gorako pilotari guztiei zabalik dagoela nabarmendu dute, parte hartzeko gonbitea luzatuz. “2020an, gutxienez, 40 urte bete behar dira”.
Urtero modura, binaka jokatuko dute txapelketa, pilota goxoa erabiliz. “Partaidetza eta adiskidetasuna mantentzeko, kanporaketako partiduetan tantoak ez dira kontutan hartzen, eta berdinketa egonez gero, partida berria jokatzen da”, azaldu dute antolatzaileek. Partidak urtarrileko, otsaileko eta martxoko domeka goizeetan jokatuko dituzte.
Parte hartu nahi dutenek izena eman behar dute aldez aurretik, herriko kiroldegian edo bestela 94- 624 30 05 telefono zenbakira deituta. Izena emateko epea 2020ko urtarrilaren 5ean amaituko da.
Euskal Herrira begira. Sei bikotek parte hartu zuten 2019ko lehen hiru hilabeteetan jokatu zen norgehiagokan; Lekeitio, Deba, Mallabia, Elgoibar, Berriatua, Mendaro eta Garzarongoak. Debara eta Berriatuara joan ziren txapelak: Iñaki Astigarraga eta Iban Gandiaga izan ziren garaile eta Jesus Beraza eta German Telleria elgoibartarra eta mallabiarra geratu ziren azpitxapeldun. “Irabazleak txapelketa guztia egin zuten partida bat bera ere galdu barik, eta meritu handiena Astigarragak eduki zuen 65 urte bete ditu-eta aurten”.
Antolatzaileen helburua txapelketa etorkizunean Euskal Herriko beteranoen txapelketa bihurtzea da, eta bide horretan inguruko pilotari guztiak animatzen dituzte norgehiagokan parte hartzera. “Ea Mutriku, Ondarroa, Gernika-Lumo, Markina-Xemein, Munitibar eta eskualdeko jendea animatzen den”.
Aurten, gainera, hamabosgarren txapelketa dutenez, kirol eta kultur ekintza desberdin bat antolatzen saiatuko direla ere aurreratu dute.
