Zirkulatzeko prestatu dira Markina-Xemeinen
Eusko Jaurlaritzaren Segurtasun Sailak abiarazitako Zirkulatzeko Prest sentsibilizazio programaren eskutik hainbat jolas eta ekimen eduki dituzte, zirkulazioari dagozkion neurri eta arauak ikasi edo gogoratzeko.
Zirkulatzeko prest egon dira ume eta gaztetxoak gaur [abenduak 14] goizean Markina-Xemeinen. Hainbat jolas eta ekimen eduki dituzte, jolasaren bidez zirkulazioari dagozkion neurri eta arauak ikasi edo gogoratzeko.
Gaurkoa Eusko Jaurlaritzaren Segurtasun Saileko Trafiko Zuzendaritzak bide-segurtasunaren inguruan abian jarritako Zirkulatzeko PREST izeneko sentsibilizazio programaren ekimena izan da. Programaren helburua herritarrei jolas moduan eta jai-giroan seguru zirkulatzeko, istripuak saihesteko eta mugikortasun-sistema ezberdinen arteko elkarbizitza sustatzeko jarraitu beharreko arauak hurreratzea da. Bost gune prestatu dituzte horretarako frontoi nagusiaren aurrean eta Plazabarripean.
Eskumuturrekoa jantzi eta gune batetik bestera ibili dira ume eta gaztetxoak. Txirrina edo txapak egiteko eskulanak, bizikleta eta patineteentzako zirkuitua, dominoa, puzzleak eta photocall bat eduki dituzte besteak beste. Gune guztietatik igaro eta PREST berba osatu dutenek, gainera, oparia eduki dute amaieran.