Gonzalezek eta Manzisidorrek eskuratu dute Xistera Zirkuituko finalerako bigarren txartela
Miarritzeko Bixente Gonzalez eta Mutrikuko Mikel Manzisidorrez gain, Vidal eta Mugartegik ere lortu dute zapatuan Markina-Xemeinen jokatuko duten finalerako txartela. Merino eta Lizardi, berriz, emakumezkoen mailako bigarren finalistak izango dira.
Bixente Gonzalez eta Mikel Manzisidor. Argazkia: Xistera Xistera Zirkuituko emakumezkoen eta gizonezkoen bi maila nagusietako finalak erabakita geratu dira, domekan [abenduak 15] Miruaitzen finalerdiak jokatu ondoren. Azken txanpan jokoan egon den bigarren txartelari esker, datorren zapatuan [abenduak 21] Markina-Xemeingo Uni frontoian jokatuko dituzten finaletako bikote finalistak zeintzuk izango diren jakitera eman ditu Xisterak. Antxon eta Goixerri gizonezkoen lehen mailako finalisten aurka Gonzalez eta Manzi ariko dira nor baino nor indartsuago.
Gizonezkoen bigarren mailan, berriz, Vidal eta Mugartegik lortu dute finalerako bigarren txartela. Ibañez eta Olazagazti izango dituzte aurrez aurre. Emakumezkoetan Merino eta Lizardi ariko dira Aldazabalen eta Calvoren aurka.
Finalerdietako partiduei dagokienez, Bixente Gonzalezek eta Mikel Manzisidorrek sekulako kiniela jokatu zuten gizonezkoen lehen mailan. Gonzalez-Manzi 25, Arbe-Danel Mandiola 13 eta Aaron-Uranga 11. Miarrizkoa eta Mutrikukoa ez ziren ongi hasi, atzean geratu baitziren lehen tantoetan, baina behin bosgarren tantotik aurrera hasi ziren gauzak ondo egiten. Hiru bikoteak hamargarren tantora arte nahikoa parekatuta joan ziren, baina hortik aurrera Gonzalez eta Manzi jaun eta jabe izan ziren, finalerako txartela lortuz.
Gizonezkoen bigarren mailako finalerdia oso orekatua hasi zuten aurreneko hamar tantoetan. Urrutia eta Garat, askorentzat finalerdia irabazteko faboritoak, kateatuta geratu ziren lehenengoak izan ziren. Gainerako bi bikoteek aurrera egin zuten. Erdi parekatuta ibili ziren, baina hamabosgarren tantotik aurrera, Vidal eta Mugartegik ihes egiten hasi ziren, eta ez zuten barkatu. Vidal-Mugartegi 25, Garcia-Goitiandia 19 eta Urrutia-Garat 13.
Emakumezkoen finalerdian, azkenik, 25era jokatutako kinielan Merinok eta Lizardik nagusitasun osoz irabazi zuten. Merino-Lizardi 25, Ortiz de Mendibil-Mariona 8 eta Carla-Raquel 6. Lehen tantoetan egon zen bakarrik oreka. Hortik aurrera, gainerako pilotariak mendean hartu zituen Lizardik atzean, eta aurrean Merino bikain aritu zen, tantoak oso ondo bukatuz eta ongi merezitako garaipena lortuz.
