Dema politak dakartza Beteranoen XV. Trinketeko Txapelketak
Norgehiagokak 09:15ean hasiko dira, eta bikote batzuk bi partida jokatuko dituzte.
Eibartarrak jokoan, Beteranoen Trinketeko Txapelketako lehen jardunaldian. Argazkia: Akarregi Pilota Elkartea Bost partidekin jarraituko du domekan [urtarrilak 19] Beteranoen XV. Trinketeko Txapelketak. Norgehiagokak 09:15ean hasiko dira, eta bikote batzuk datorren asteko partida aurreratzen dutenez, bi partida jokatu beharko dute.
Datorren asteko partida aurreratu behar duen bikoteetako bat Roberrek eta Condek osatutakoa izango da. 09:15etan Hidalgo eta Moralen aurka ariko dira. Txapelketako antolatzaileek jakitera eman dutenez Txapartegi lesionatuta dago, eta ez du domekan jokatzerik edukiko. Hori dela eta, bere tokia Luis Moral lekeitiarrak hartuko du. “Rober eta Conde faboritoak dira baina ezustekoren bat ere egon daiteke”.
Lehenengo partidua amaituta, Beraza eta Telleriagaz neurtuko dira Rober eta Conde. 10:00etan hasiko dute norgehiagoka. Beraza eta Telleria iazko finalistak direla gogora ekarri dute txapelketaren antolatzaileek, eta oraingoan ere joko ona erakusten ari direla diote. “Hala ere, Rober eta Conde lehen partidutik nekatu gabe irteten badira, zailtasunak sortu ditzakete”.
Berazak eta Telleriak hirugarren partidua ere jokatuko dute. Martin eta Foster izango dituzte aurkari 10:45ean hasiko duten partidan. Martin eta Foster lekeitiarrak oso momentu onean daude, eta kontrarioen nekeaz baliatu daitezkeela uste dute antolatzaileek ligaxkako bigarren partida irabazteko. “Ez da erraza izango, baina seguru saiatuko direla”.
Hurrengo partida biak Gandiaga anaiak eta Asti-Pradera, eta Urkiaga-Madariaga eta Jaunarena-Egaña bikoteen artekoak izango dira. Lehenengoak 11:30ean aterako dira trinketeko kantxara eta bigarrenak 12:15ean.
Gandiaga anaiak eta Asti-Pradera bikoteen arteko norgehiagoka eguneko partida izango dela azaldu dute txapelketaren antolatzaileek. “Naiz eta Berriatuko anaiak faboritoak izan, Asti eta Pradera gogor datoz eta aurreko domekako jokoa erakusten badute, dema polita ikusiko dugu”.
Domekako azken partida ere parekatua izango dela uste dute. Urkiaga eta Madariaga eibartarrak txapelketan hasi berriak dira, baina lehen partidan oso ondo egokitu ziren trinketera. Hala ere, aurrean sekretu guztiak ezagutzen dituzten beterano bi izango dituzte. Izerdia bota beharko dute partida aurrera atera nahi badute. Euren alde, gaztetasuna eta ausardia daukate”.
