Dena prest Markina-Xemeingo EPELen partidarako
EPELen Eskuz Binakako Txapelketako hamargarren jardunaldia jokatuko dute Ezkurdia-Martija eta Jaka-Zabaleta bikoteek zapatuan, Markina-Xemeingo Uni frontoian. Norgehiagokarako pilotak aukeratu dituzte gaur goizean. Puntua borrokatzeko gogoz daudela erakutsi dute.
Zabaleta, Jaka, Ezkurdia eta Martija gaur goizean Markina-Xemeingo frontoian egindako materialaren aukeraketan. Zapatuan [urtarrilak 25] Markina-Xemeinen jokatuko den EPELen Eskuz Binakako Txapelketako partiduko pilotak aukeratuta daude. Lau protagonista nagusiak Markina-Xemeinen egon dira gaur [urtarrilak 22] goizean, Uni pilotalekuan jokatuko duten pilota partidarako materiala aukeratzen. Joseba Ezkurdia, Julen Martija, Erik Jaka eta Jose Javier Zabaleta pilotalekuko kantxan aritu dira pilotak probatzen.
Kalkuluak egiten ez dela hasi azaldu du Erik Jakak, baina Markina-Xemeingo partidua irabaziz gero ia-ia eskuetan izango lukete finalaurrekoetarako pasea. Partida bakarra galduta 8 puntu lortu ditu Jaka-Zabaleta bikoak jokatu diren bederatzi jardunaldietan, eta sailkapenaren buruan daude hiru puntuko aldeagaz. Atzean tropel handi bat daukate 5na puntugaz, eta atzetik Irribarria eta Rezusta laugaz eta Olaizola eta Urrutikoetxea hirugaz. Horiek denak lehen seiren artean sartzeko borrokan ibiliko direla uste du Jakak, eta beraz, beste puntu bat ateratzeak mesede egingo diela azpimarratu du.
Aurkariei begiratuta, Ezkurdia-Martija bikote oso konpentsatua dela dio Jakak. “Josebak izugarrizko lana egiten du, lan zikin asko kentzen dio Juleni eta konfiantza handia ematen dio. Erasoan ez dauka ezer demostratu beharrik defentsan ere ez. Joseba Asperen pilotari garrantzitsuenetako bat da, eta gauzak oso ondo egin beharra daude beraiei irabazteko”.
Jaka eta Zabaleta pilotak aukeratzen.
Lehiatzeko prest. Joan den asteburuko partida galduta, hurrengo puntua eskuratzeko gogoz daude Ezkurdia eta Martija. Jaka eta Zabaletari irabaztea osoa zail dagoela aitortu du Julen Martijak, baina lehiatzeko prest agertu da. “Ikusi da nola jokatzen duten biek, oso momentu onean daude gainera, konfiantzagaz. Joseba saiatuko da aurrean abiadura ematen eta ni saiatuko naiz Zabaletari eusten eta Jakari ahalik eta pilota gehien kentzen. Oso partidu zaila daukagu, baina saiatuko gara”.
Bost puntugaz dauden lau bikoteren artean daude Ezkurdia eta Martija, aukerekin finalaurrekoetan sartzeko, eta beraz zapatuko partidua irabaztea garrantzitsua da bikotearentzat. “Dena oso estu dago eta oso garrantzitsua da oraingo partiduetan ahalik eta puntu gehien lortzea, bestela beste bikoteek lortzen dituzte”.
Ezkurdia eta Martija pilotak aukeratzen.
Sarrerak agortzen. Lau pilotarietako batek ere ez du jokatu aurretik Markina-Xemeingo frontoian, eta gaur ikusitakoaren arabera frontoi oso ona iruditu zaie. Material nahiko antzerakoa aukeratu dute bi bikoteek. Esan dutenez, ez dira pilota bizien zaleak, eta Uni-n jokatzeko pilota egokiak aukeratu dituztela azaldu dute: “Bote ona ez duten pilotak dira, frontisean irteera normaleko pilotak eta lurren azpitik ibiltzen direnak; inongo aitzakiarik ez daukan materiala”.
Markina-Xemeingo frontoi nagusia beterik aurkituko dute zapatuan. Markina-Xemeingo Esku Pilota Taldekoek jakitera eman dutenez jadanik 800 sarreratik gora salduta daude eta 50-60 inguru besterik ez dira geratzen. Azken sarrera horiek internet bidez edo pilotalekuko leihatilan eskuratu ahalko dira. Barikuan [urtarrilak 24] eta zapatuan [urtarrilak 25] zabalduko dute leihatila: barikuan 18:00etatik 20:00etara eta zapatuan 11:00etatik 13:30era eta 16:30etatik aurrera.
Zapatuko jaialdia 18:00etan hasiko da, eta lehenengo, Victor-Larunbe eta Bakaikoa-Aretxabaleta bikoteen arteko partidua egongo da.
