Hirugarren jardunaldiari kolpeko dio Beteranoen Txapelketak
Zapatuan [urtarrilak 25] eta domekan [urtarrilak 26] jokatuko dira norgehiagokak Lekeitioko trinketean. Pilotarien arazo desberdinak direla eta bi partida besterik ez dira egongo.
Gandiaga II.ena pilotari ematen. Argazkia: Akarregi Pilota Elkartea Beteranoen Trinkete Txapelketako ligaxkako bi partida jokatuko dira asteburuan Lekeitioko trinketean. Zapatuan [urtarrilak 25] eta domekan [urtarrilak 26] jokatuko dira norgehiagokak.
Martin-Foster eta Gandiaga anaiek neurtuko dituzte indarrak zapatuan. Partida 18:30ean hasiko da, eta lehia gogorra espero dute antolatzaileek. Azaldu dutenez, Berriatuko anaiak dira faboritoak, baina aurrean sasoi onean dauden lekeitiarrak izango dituzte.
10:00etan jarri du antolaketak ordua, asteburuko bigarren partidurako. Madariaga-Urkiaga eta Astigarraga-Pradera aurkituko dira aurrez aurre. Eibartarrek jokatu dituzten partida biak irabazi dituzte, baina Astigarraga iazko txapelduna eta Pradera mallabitarra faboritoak direla diote antolatzaileek, beraz, partida polita itxaroten dute.
Asteburu honetarako aurreikusita zeuden beste partidak atzeratu egin dituzte, pilotarien arazo desberdinak direla eta. Joan zen domekan [urtarrilak 19] jokatu zuten txapelketako bigarren jardunaldian, berriz, bost norgehiagoka egon ziren.
Ezustekoak. Lehenengo norgehiagokan Rober eta Conde izan ziren nagusi Hidalgo eta Morali 30-22 irabazi ondoren. Txapartegi min hartuta zegoela eta, Luis Moralek hartu zuen bere tokia, eta naiz eta aurrelaria izan, atzetik ere ondo moldatu zen. Partidako hainbat momentutan indarrak orekatuta egon ziren. Azken txanpan, Roberren sakeak eta bere gatzak, partida balantzatu zuen euren alde.
Bigarren partidua berdinduta joan zen 17. tantora arte. Baina, Beraza eta Telleria, iazko txapeldunak, jokoa bizitu eta Rober eta Conderi partida irabazteko gai izan ziren. Pareko ibili ziren bai eta ere, Martin-Foster eta Beraza-Telleria bikoteak. Beraza eta Telleriarentzat bigarren partida izan zen, eta nabaritu egin zuten. Horrela, ezustekoa eman zuten Martin eta Fosterrek faboritoei 30-28 irabaziz.
Domekako partida onena Gandiaga anaiek eta Astigarragak eta Praderak eskaini zuten. Laurak bikain aritu ziren ikuskizun dotorea eskainiz. Astigarragak sarea ondo babestu zuen eta Pradera sendo agertu zen, beraz, Gandiaga anaiei kostatu egin zitzaien tantoak egitea. 26-25 zihoazela Astigarragak sake falta egin zuen, eta Gandiaga anaiek aukera aprobetxatu zuten amaierara arteko bidea zabaltzeko. 30-25 gailendu ziren.
Madariaga-Urkiaga eta Jaunarena-Egaña bikoteen arteko lehiagaz amaitu zen bigarren jardunaldia. Urkiaga eibartarrak bikain jokatu zuen, atzean ondo moldatzen dela erakutsiz. Madariagaren laguntzagaz hurrengo fasera igarotzeko hautagai sendoak dira. 30-17 irabazi zuten.
