Ke detektagailuak jartzen ari dira Lekeitioko nagusien etxebizitzetan
Lekeitioko Udalak eskaintzen duen zerbitzua doakoa da, eta pertsona nagusien segurtasuna eta bizi kalitatea hobetzea ditu helburu.
Urtero modura, suteak ohartarazteko ke detektagailuak jartzen ari da Lekeitioko Udala pertsona nagusien etxebizitzetan. Aurten, zerbitzu horren onuradunak 86 urtetik gorako herritarrak direla jakitera eman dute, baina hurrengo kanpainan, 2020ko abendukoan, 83ra jaitsiko dute adina.
Azaldu dutenez, ohi modura, zerbitzua doakoa izango da herritarrentzat, eta aurreko urteetan aparatua etxebizitzetan dutenek ere doako mantenu zerbitzua izango dute. Izan ere, udalak hartuko du bere gain kostu osoa. “Nagusiek, mugikortasun-arazoak dituztenez, ebakuazio azkar bat egin ahal izateko, garrantzitsua da erreakzio-denborak murriztea”, azaldu dute. Egitasmo horren bidez, gainera, erabiltzaileei udalak eskaintzen dituen zerbitzuei buruzko informazioa ematen diete, eta hala badagokio, horiek kudeatzen lagundu. Pertsona nagusien segurtasuna eta bizi kalitatea hobetzea dauka helburu egitasmoak.
