Lekeitiko Udalak Eliz Ateako gasolindegi zaharraren eraikina berrizteko proiektua jarri du martxan
Eraikina turismo bulego berria kokatzeko gune ezin hobea dela baloratu dute. Proiektu teknikoa egiten ari dira horretarako.
Eliz-Atea kalea. Eliz Atea kaleko gasolindegi zaharraren eraikina berriztuko du Lekeitioko Udalak. Lekeitioko erdigunetik hurbil egonik, eraikin hori turismo bulego berria kokatzeko gune ezin hobea dela baloratu dute, eta eraikina berrizteko proiektua idazteko lanak eman dituzte.
Azaldu dutenez, gasolindegiaren proiektuagaz bere baliabideak hobetu eta urte askoan erabilpenik eduki ez duen eraikina berreskuratu nahi dute, udal zerbitzuak emateko. “Turismo bulego berria kokatzeko gune ezin hobea dela baloratu da. Lekeitioko erdigunetik hurbil dago eta alde zaharra, eliza, portua edota hondartza alboan ditu, besteak beste”. Bulegoaren leku aldaketa horrek eraikinaren inguruko proiektu tekniko bat egitea eskatzen du, eta Eliz Atea kalearen berrurbanizazioaren laugarren fasean barneratuko lukete. Proiektua idazteak 10.971,07 euroko kostua izango du, eta jada adjudikatuta dagoela jakitera eman du udalak, “bere lanketa martxan dago”.
Auzoko bizilagunen eskariari erantzunez, azken urteetan inguru hori hobetzeko egindako lanak amaitutzat emango dituzte proiektu horregaz. Orain arte, guztira, 578.062,81 euro inguru inbertitu dituzte Eliz Atearen berrikuntza lanetan. 2016 urtean hasi ziren lanekin. Orduan, gasolindegi zaharraren inguruko lurzorua aztertu zuten kutsatutako lurzoruaren aitorpena egiteko eta saneatzeko prozesuak eta obrak egin zituzten. Bestalde, gasolindegiko lurzorua ordenazioz kanpo zegoela eta, arau subsidiarioen aldaketa puntuala egin zuten, berton esku hartu ahal izateko eta bere erabilera aukerak gehitzeko.
Jakitera eman dutenez, Eliz Atean kokatuta dagoen eraikina, Alvaro Libano arkitektoak diseinatu zuen 1962 urtean, eta Nazioarteko Abangoardia edo arrazionalismo estilokoa da. Urte horretatik eta 2007ra bitartean gasolindegia egon zen bertan.
