Xistera Zirkuituaren denboraldiko azken finaletan ariko dira Bilbao, Urreisti eta Manzi
Manzi eta Urreisti mutrikuarrek Interjaiko eta hirugarren mailako finalak jokatuko dituzte, hurrenez hurren. Bilbao berriatuarra kadeteen txapela lortzeko lehiatuko da.
Argazkia: Xistera. Xistera Zirkuituaren denboraldiko azken finalak hartuko ditu Zumaiako Aitzuri pilotalekuak, zapatuan [urtarrilak 25], 16:30etik aurrera. Kadete, Hirugarren Maila eta Interjaiko txapeldunak erabakiko dira bertan.
Manzi eta Urreisti mutrikuarrek Interjaiko eta hirugarren mailako finalak jokatuko dituzte, hurrenez hurren. Bilbao berriatuarra, ostera, kadeteenean lehiatuko da.
Kadete mailako finalarekin hasiko da zapatuko pilota jaildia. Bertan, Bilbao eta Ureta, Agirreren eta Rodriguezen aurka ariko dira zein baino zein gehiago, txapela lortzeko borrokan. Azken bikote hau zuzenean sailkatu zen finalera, eta besteek, finalerdia jokatu eta irabazi egin zuten Noainen. Agirrek eta Rodriguezek garbi daukate zuzenean finalean sartzea abantaila handia dela, nahiz eta jakin aurkariak eurak baino partida bat gehiago jokatuta iritsiko direla neurketa erabakiorrera.
“Gu finalerdi oso ona eginda gatoz, eta horrek konfiantza ematen du. Garbi dago lehenengo jokoa irabaztea garrantzitsua izango dela eta baita ere ahalik eta huts gutxien egitea”, adierazi du aurrelari berriatuarrak. Ureta zumaiarrak etxean jokatzeak ez diola presiorik eragingo dio: “Niretzat ona dela uste dut. Jende asko etorriko da eta animo asko jasoko ditugu”.
Kadeteen ostean, Hirugarren Mailakoen txanda izango da. Urreistik Del Rio arabarragaz jokatuko du eta Egaña eta San Joser izango dituzte aurkari. Azken bikote honek finalerdiak jokatu behar izan zituen azken saioan izateko; Urreistik eta Del Riok zuzenean lortu zuten finalerako txartela.
“Ahalik eta huts gutxien egitea izango da gakoa, eta ahalik eta lasaien kantxaratzea. Lehen jokoa irabaztea oso garrantzitsua da, baina ez erabakiorra. Izan ere, bigarrena galtzen bada, kontrakoa izaten baita”, zehaztu du mutrikuarrak. Iñaki del Riok ere lasai aritzeari garrantzia eman dio: “Finalak beti izaten dira bereziak jokatzeko; tentsio handia izaten da. Ahalik eta lasaien jokatzea izango da garrantzitsua”.
Egaña aurrelari zumaiarra Urreistiren aurka askotan aritutakoa da. Argi dauka ahalik eta hutsik gutxien egitea izango dela gakoetako bat. “Pilotari handia da Eñaut Urreisti, eta berari irabazteko oso huts gutxi egin beharra dago. Etxean aritzeak ez dit presiorik sortzen, finalak berak bai, honelako final batek beti ematen du errespetua”.
Egañak San Jose izango du lagun atzean. Gasteiztarrak badaki zer egin beharko duten irabazteko: “Ahalik eta huts gutxien egin, eta atzean nagusitzen saiatu behar gara. Garrantzitsua izaten da lehen jokoa irabaztea, baina ez erabakiorra”.
Interjaiko finala izango da azkena. Laloo eta Manzi Aaronen eta Zugaitzen aurka neurtuko dira. Mutrikuarrak dioenez, ez da final erraza izango: “Ligaxkan irabazi genien, eta horrek beti ematen du indarra, baina hau partida ezberdina izango da. Nire ustez, lehen jokoa irabazteak ere garrantzi handia izan lezake, bigarrenerako lasaitasun apur bat ematen baitu, eta aurkariei presio handia sartu”.
Aaronen gasteiztarrak eurek “bikote handia” osatzen dutela azpimarratu du: “Ligaxkan galdu egin genuen euren aurka, baina orain arteko mailan jokatzen badugu, izango ditugu aukerak. Donibane Lohizuneko Zugaitzek esan du lan ona egin eta “denak emanda” jokatuz gero, gauzak zail jarriko dizkietela aurkariei.
Xistera Zirkuituko finalak:
- Kadeteak: Agirre-Rodriguez VS. Bilbao-Ureta
- Hirugarren maila: Urreisti-Del Rio VS. Egaña-San Jose
- Interjai: Laloo-Manzi VS. Aaron-Zugaitz
