Izaro Aranburu aulestiarrak Euskadiko txapela jantzi du
18 urtez azpikoen Euskadiko Kros Txapelketa irabazi du Aranburuk, eta bere Durango KT da taldekako Euskadiko txapeldun.
Argazkia: Juan Sampedro. Euskadiko Kros Txapelketa domekan lehiatu zuten Gernika-Lumo eta Arratzun artean, eta zortzi lasterketa egin zituzten, lau kategoriatan banatuta: kadete, gazte, junior eta absolutu.
Durango Kirol Taldeko Izaro Aranburu aulestiarrak irabazi zuen 18 urtez azpikoen lasterketa, 16:01 denboragaz. Gainera, kategoria horretan Durango KT da taldekako Euskadiko txapelduna; Aranbururen taldekideak dira Izaro Egibar bermeotarra (12.en amaitu zuen) eta Urtza Agirre ondarrutarra (14.ena). Durangoko taldeaz gain, Amara BATek lortu du Espainiako Txapelketara sailkatzea–otsailaren azken aurreko asteburuan Sorian lehiatuko dute–.
20 urtez azpikoetan, berriz, Lekeitioko Tximista Atletismo Taldeko Lorea Erekatxo bermeotarra laugarren sailkatu zen, eta Euskadiko selekzioagaz Espainiako txapelketan parte hartuko du, martxoaren 8an. Maila horretan aritu zen Aiora Agirregomezkorta ere. June Markes eta Jule Goikoetxea taldekideak, berriz, 18 urtez azpikoetan lehiatu ziren.
