Aulestiko zaldi mandoen txapelketa lehiatzeko domekan izena eman behar da
Interesatuek 12:00etan udaletxean izena eman beharko dute. Martxoaren 19tik 23ra egingo dute eta Euskal Herriko Txapelketarako puntuagarria da.
Martxoaren 19tik 23ra egingo dute Aulestiko Zaldi Mando Proben Txapelketa Jabier Urberuaga eta Juan Felix Ansotegi Antso memoriala, eta parte hartu gura dutenek domekan (martxoak 1) izena eman behar dute, udaletxean. 12:00etan jarri dute ordua eta bertaratu ezin direnentzat honakoa da telefono zenbakia: 94-627 90 06.
Euskal Herriko Txapelketarako puntuagarria izango da.
Aulestiko 1.050 kiloko harriagaz ariko dira deman. Abereen oinarrizko pisua, 400 kilokoa izango da. Saioak hasi baino ordubete lehenago egingo dituzte pisaketak eta ezarritakoa baino gehiago pisatuz gero, kilo bakoitzeko kilo bateko gainkarga hartuko dute.
Betiko moduan, Bizkaiko Kirol Federakundearen kontrolpean egongo dira saioak. Martxoaren 19ko eta 22ko probak 18:00etan hasiko dituzte, eta gainontzeko egunetan, 21:00etan.
Sariak. Lehen hamar sailkatuaek jasoko dituzte diru sariak, eta Lea-Artibaikoen aparteko sailkapena ere egingo dute, lehen hirurak sarituz.
Txapeldunak Aulestiko Udalaren manta, 800 euro eta Urdakik emandako urdaiazpikoa irabaziko ditu. Txapeldunordeak Urdakik emandako txakolin kaxa eta 700 euro jasoko ditu, eta hirugarren sailkatuak 650 euro eta hiru txakolin botila.
Eskualdeko onena, berriz, Ibetarrik emandako manta, 200 euro eta Sagarmiñak emandako txakolin kaxagaz sarituko dute. Bigarren sailkatuari 150 euro eta Urdakik emandako hiru txakolin botila emango dizkiote eta hirugarrenari 115 eruo eta hiru txakolin botila.
