Haur errefuxatu sahararrak euskal familietan hartzeko deialdia egin du Lekeitioko Udalak
Elkarte eta udal ezberdinek euskal familiak Oporrak Bakean programan parte hartzera animatzeko kanpaina jarri dute martxan. Oporrak Bakean programak 10 eta 12 urte bitarteko haur saharar errefuxiatuak udan, bi hilabetez, euskal familiekin bizi daitezen sustatzen du.
Ume sahararrak Lea-Artibain. Badira 30 urte baino gehiago euskal familiek Oporrak Bakean programaren bidez udako hilabeteetan haur sahararrak euren etxeetan jasotzen dituztela. 2019ko udan 289 neska eta mutil saharar etorri ziren Bizkaia, Gipuzkoa eta Arabara, eta, aurten ere beste horrenbeste etortzea nahi da. Horretarako, gutxienez, 100 familia gehiago beharko dira. Hori dela eta, hainbat elkarte eta udalek euskal familiak programan parte hartzera animatzeko kanpaina bat abiarazi dute, eta ekimenagaz bat egin du Lekeitioko Udalak.
Gogora ekarri dutenez, Herri Sahararrak 40 urte baino gehiago daramatza errefuxiatu kanpamentuetan bizirauten, munduko basamorturik idorrenetako batean. Kanpamentu horietan, 14 urtetik beherako 56.000 ume bizi dira, klima gogorra eta elikadura gabezia handiekin. Hori dela eta, Oporrak Bakean programak 10 eta 12 urte bitarteko haur saharar errefuxiatuak udan bi hilabetez euskal familiekin bizi daitezen sustatzen du. Egonaldi horien helburuak umeak basamortuko baldintza gogorretatik urruntzea, hazten ari diren adin honetan lagunduko dituen elikadura egokia jasotzea, azterketa medikuak egitea eta euskal kultura eta saharar kulturen arteko lotura sustatzea dira.
Lekeitioko Udalak azaldu duenez, gero eta zailagoa izaten ari da familiek ume sahararrak hartzea, eta ondorioz, beste bide batzuk bilatu behar izan dira haiei laguntzeko. Formula berri horien artean Ondarroan kokatuko den aterpetxea aipatu dute, Lekeitioko Udalak diruz laguntzen duena.
Programan parte hartu nahi dutenez Oporrak Bakean programaren webgunean daukate informazio guztia. Horrez gain 658 75 13 59 telefonora deitu dezaketela gaineratu dute.
Bestalde, bihar [otsailak 27] Saharar Errepublika Arabiar Demokratikoa aldarrikatu zuteneko 44. urteurrena betetzen da, eta horren adierazgarri udaletxean Saharako bandera jarriko dutela aurreratu dute.
