Euskal Herriko txapela jokatuko du Xabier Beitia lekeitiarrak
Zapatuan [martxoak 7] dauka finaleko norgehiagoka Zornotzako pilotalekuan. Aimar Morgaetxebarria atzelari zornotzarragaz bikotean ailegatu da gazte mailako finalera.
Xabier Beitia eta Aimar Morgaetxebarria pilotariak. Argazkia: Beitia EHko Kluben Arteko Eskuz Binakako Txapelketaren finala jokatuko du zapatuan [martxoak 7] Xabier Beitia lekeitiarrak. Aimar Morgaetxebarria zornotzarragaz bikotean ailegatu da gazte mailako finalera.
Beitia Lea Ibarra Motrollo taldeko pilotaria bada ere, azken denboraldia Zornotzako Lagun Onak taldeagaz egiten ari da. 18:15etan izango dute finaleko norgehiagoka Zornotzako Zelaieta pilotalekuan Astigarragako Mundarro KE-ko Lizeaga anaien aurka. Beitiak ezik, aurrekontratua daukate Baiko Pilota enpresagaz final hori jokatuko duten beste hiru pilotariek.
Eskua handituta izan arren, ahalegin guztiak egingo ditu lekeitiarrak denboraldi honetako bigarren txapel garrantzitsua irabazteko. Izan ere, 2019ko abenduan gazte mailako Bizkaiko Kluben Arteko 29. Eskuz Binakako Txapelketa irabazi zuen, orduan ere Morgaetxebarria bikote zuela.
Euskal Herriko Txapelketan ere maila ona erakusten ari da lekeitiarra. Joan den asteburuan Bergaran jokatu zituzten finalaurrekoetan 22 eta 20 irabazi zieten Tolosako Altuna eta Ugartemendiari. Beitia eta Morgaetxebarria 14-6 irabazten hasi baziren ere, 18-20 jarri ziren galtzen partidari buelta eman eta garaipena lortu aurretik.
