Koronabirusa saihesteko neurriak hartu dituzte Lea-Artibaiko zenbait zahar etxetan
Momentuz Lekeitioko Uribarren Abaroa eta Ondarroako Artibai egoitzetan hartu dituzte neurriak. Bisitak egiteko ordutegiak murriztu dituzte, besteak beste.
Eusko Jaurlaritzaren eta Osakidetzaren gomendioei jarraituta, Ondarroako eta Lekeitioko zahar etxeetan koronabirusa saihesteko prebentzio neurriak hartu dituzte. Egoiliarrak kalteberatasun handia duten herritarrak direlako hartu dituzte neurriak.
Gaur gaurkoz ez da birusaren zantzurik agertu bi egoitzetan, baina hala eta guztiz ere prebentzio neurriak hartzea erabaki dute bi udalek. Lekeitioko Uribarren Abaroan sarrera mugatuko dute, denbora eta jende kopuruan. Bisitak 11:00etatik 13:00etara eta 17:00etatik 19:00etara egin ahalko dira. “Neurri hauek zentroetan dauden pertsonen, familien eta langileen osasuna bermatzeko helburuarekin hartuko dira. Egoitzako langileen aholkuak eta gomendioak jarraitzea eskatzen da. Egoera eta neurrien aldaketarik edota egoeraren inguruko berririk egonez gero, jakitera emango da”, esan dute Lekeitioko udal ordezkariek.
Bisita ordutegi bera ezarri dute Ondarroako Artibai egoitzan ere. Horrez gain, Artibai egoitzara sartzerakoan, beheko solairuan eskuak garbitu beharko dira uragaz eta xaboiagaz, eta bisitariei datu pertsonalak jasoko dizkiete. Ondoeza, sukarra edo arnasa hartzeko arazoak dituztenei ere egoitzara ez joateko eskatzen zaie. “Egoiliar bakoitzeko senide bat baino gehiagok ezingo dute sartu egoitzan, eta bisitek gehienez ere ordubeteko iraupena edukiko dute”, esan dute. Asteburuetako mezak eta Zaldupe eskola publikoko ikasleek astero egoitzara egiten duten bisita ere bertan behera utzi dituzte, egoera berrezarri arte.
