Zesta-puntako figura handiek jokatuko dute Berriatuko San Gregorio Txapelketa
Berriatuko Mendibarren frontoian jokatzen hasiak diren norgehiagokan parte hartuko dute besteak beste Miamiko denboraldia amaituta datozen Aritz Erkiaga eta Diego Beaskotxea pilotariek. Kadete, 22 urtez azpi eta senior mailak ere ari dira lehian.
Iazko San Gregorio Txapelketako finalistak. Argazkia: Berritxu Zesta Eskola Berriatuko elite mailako San Gregorio Txapelketa berritasunez bete ailegatu da aurten. Izan ere, txapelketan parte hartuko duten pilotarien artean modalitateko figura handienetako batzuk daude. Besteak beste Miamiko denboraldia jokatuta, Berriatuko Mendibarren frontoian jokatzen hasiak diren norgehiagokan parte hartuko dute Aritz Erkiaga eta Diego Beaskotxea pilotariek. Erkiagak Roberto Lekue Milford eta Daniako jokalari ohiarekin jokatuko du, eta Beaskoetxeak Aimar Aldazabal azken Banakako Txapelketako txapeldunordea izango du bikote. Horiek izango dira gainditu beharreko bikote handiak.
Baina ez dira izen ezagun bakarrak izango. Miamiko azken denboraldia jokatu duen Garita ere lehian egongo da, eta Jokin Arbe markina-xemeindarragaz osatuko du bikotea, Dania Jai Alaiko (Florida) taldekideak izan dira biak. Antxon Alberdi, Berriatuko klubeko pilotaria Thibault Basque Lapurdiko promesa handiagaz ariko da; Patxi Tambourindeguy, Txabi Inzagaz; Jean Olharan, Manzisidor mutrikuar gazteagaz; Alex Hormaetxea, Manex Urtasunegaz, eta Christophe Olha, Zabalagaz.
Berriatuko txapelketa pilotari afizionatuei zuzendu izan ohi da, baina, aurten, profesional askorentzako udako denboraldiari begirako prestaketa bezala balioko du. Hala, zortzi bikote handi horiek Berriatuko San Gregorio Txapelketan aurkituko dira aurrez aurre, zesta-punta zaleen gozamenerako.
Otsailaren 28an hasi zen ikuskizuna, eta lehen partidan, Olharan eta Manzisidorrek garaipena lortu zuten Olha eta Zabalaren aurka, 30-27. Bariku honetan [martxoak 6], berriz, Patxi Tambourindeguy eta Inza neurtu behar ziren Arbe eta Garitaren aurka, baina Garita min hartuta dagoela eta, bertan behera geratu zen partida.
Maila gehiago. Elite mailakoez gainera, beste hiru mailatan ere jokatzen ari dira txapelketa: Kadete mailan, 22 urtez azpikoetan eta senior mailan. Kadeteak bi taldetan banatuta ari dira jokoan. Alde batetik, zortzi bikote ari dira beste bi taldetan banatuta kadete 2 mailan, eta bestetik, bost bikote kadete 1 mailan. Azken horiek denek denen kontra jokatu beharko dute. 22 urtez azpikoetan ere berdin. Bost bikote ari dira lehian eta denek denen kontra jokatu beharko dute. Senior mailan, azkenik, bi taldetan banatuta daude, eta hiru bikote daude bakoitzean.
Kadete mailako bi partida jokatu dira asteburuan. Lehenengoan, Arrasate -Patxi eta Arratibel-Moreno aurkitu ziren aurrez aurre; 30-17 irabazi zuten lehenengoek. Bigarren norgehiagokan, Paredesek eta Oierrek 30 eta 21 irabazi zieten Ibarluzeari eta Joni.
Aste honetan, berriz, hurrengoak izango dira jokatuko diren norgehiagokak:
–Eguaztena [martxoak 11], 19:00etan, Elite maila: P. Tambo-Inza/Antxon-Basque
–Eguena [martxoak 12], 19:45ean, Senior maila: Cosme-Etxabe/Aizpurua-Andonegi
–Barikua [martxoak 13], 19:45ean, Elite maila: Beaskoetxea-Aimar/Olharan-Manzi
Final handia maiatzaren 16an jokatuko da Mendibarren.
