Ezhoiko egoera eta neurriak hartu dira HITZAn ere
Lea-Artibai, Mutriku eta Busturialdeko HITZAk eguneroko lanari eutsiko dio, baina barikuetan zortzi orrialdetako egunkaria argitaratuko dugu.
Agerikoa da koronabirusaren eragina HITZAn eta 11Barri enpresa lankidean ere. Aurreko egunetatik aritu dira lantaldekoak ezohiko egoera honen aurrean nola jokatu zehazten, eta neurri batzuk martxan jarrita daude. Erabaki nagusia da lantaldearen zati batek etxetik lan egingo duela: lankide batzuk atzo hasi ziren neurri horregaz, eta gaurtik aurrera gehiago ere hasiko dira etxetik lanean.
Etxetik lan egiteko erabakiak bi helburu ditu: zaintza eta lana uztartzea, ahalik eta malgutasun handienagaz eta ikuspegi epidemiologikotik, HITZAren funtzionamendua bermatzea.
Izan ere, koronabirusaren zabalkundea geratzeko ezarritako prebentzio neurriengatik ekintza guztiak bertan behera geratu badira ere, HITZAko lantaldeak eguneroko jardunari eusteko apustua egin du. Ezinbestean, baina, aldaketak egongo dira.
Egunkaria martitzenetik barikura argitaratzen jarraituko dugu, baina datozen bi asteetan barikuetan zortzi orrialdeko egunkaria argitaratuko dugu, eta ez 16 orrialdekoa. Izan ere, barikuetako zenbaki berezian orain arte argitaratu izan ditugun kirol eta kultur agendako bina orrialdeak desagertu egingo dira –martxoaren 13ko egunkarian ere aldaketak egin behar izan genituen, jarduera asko bertan behera utzi zituztelako–, kirol jarduerarik eta kultur ekitaldirik ez delako ez antolatuko ez eta egingo ere.
Edonola ere, egoera berezi honi buruz herritarrak informatuta mantentzea da HITZAren ardura orain, eta Lea-Artibai, Mutriku eta Busturialdeko Hitzako lantaldea ahalegin berezia egiten ari da horretarako. Ekitaldi, prentsaurreko eta eguneroko jarduna, oro har, eten egin diren arren, egunero informatzen jarraitzeko konpromisoa hartu du komunikabideak. Paperekoan ez ezik, wegbunean ere azken ordukoak ematea da asmoa. Horretarako, informazioa telefonoz batu beharko du lantaldeak. Hala, eskualdeko eragile, talde, arduradun politiko, sindikal eta abarrei hartu-emanetan jarraitzeko gonbidapena luzatu nahi die HITZAk. Kazetarien jardun arduratsua zainduz, herritarrei informazioa helarazteko eta desinformazioak sor ditzazkeen eragozpenak saihesteko.
