Martxan dago Lea-Artibaiko hamalaugarren Enpresa Proiektu Lehiaketa
Lea-Artibai eskualdean kokatutakoez gain, Busturialdea, Durangaldea eta Debabarrenakoak ere aurkeztu ahalko dira. Martxoaren 31ra arte aurkeztu ahalko dira enpresa proiektuak.
2019ko Enpresa proiektu lehiaketaren irabazleak Etxebarrian egindako sari banaketa ekitaldian. Azaro Fundazioak eta Leartibai Garapen Agentzia-Behargintza enplegu eta tokiko garapenerako zentroak, Lea-Artibaiko hamalaugarren Enpresa Proiektu Lehiaketa abiarazi dute. Urtero modura, ekintzaileen ahalegina eta lana saritu, eta Lea-Artibai eskualdean lanpostuak sortzea ditu helburu Bizkaiko Foru Aldundia eta Lea-Artibai eta Busturialdeko Kooperatiben Mahaia Elkartearen laguntzagaz antolatu duten lehiaketak.
Zehaztu dutenez, 2019 urteaz geroztik Lea-Artibai eskualdean enpresa berri bat martxan jarrita edo 2020an martxan jartzeko asmoa duten ekintzaile guztiak aurkeztu daitezke lehiaketara. Lea-Artibai eskualdean kokaturikoez gain, Busturialdea, Durangaldea eta Debabarrenan kokatutakoak ere aurkeztu ahalko dira; martxoaren 31ra arte edukiko dute proiektuak lehiaketara aurkezteko epea zabalik.
Hiru modalitatetan bereiziko dira aurten proiektuak: negozio ideia berritzaileak (2.000 euro) ; merkataritza, ostalaritza, turismo eta zerbitzu enpresak (1.500 euro); eta proiektu kooperatibo onena (2.000 euro).
Horrez gain, saria eskuratzen duten ekintzaileek Lea-Artibai Berrikuntza Gunean dagoen enpresa-haztegian kokatzeko erraztasunak izango dituzte, eta erakunde antolatzaileek kudeatzen dituzten programa ezberdinetan parte hatzeko aukera ere izango dute. Gainera, enpresa martxan jarri arte eta hurrengo urteetan aholkularitza eta laguntza ere jasoko dute.
Herritarren parte hartzea. Edizio honetan gainera, herritarrek enpresa proiektu onena bozkatzeko aukera edukiko dute. Horretarako, antolatzaileek euren sare sozialen bidez lehiaketara aurkezten diren proiektuekin erlazionatutako argazki eta proiektu zein jardueraren azalpen laburrak argitaratuko dituzte. Apirilaren 6tik 26ra parte hartu ahalko da bozketan, eta parte hartzen duten herritarren artean Hamen Bertokoa otzara bat zozketatuko dute.
Sari banaketa maiatzaren 7an izango da, Markina-Xemeinen ospatuko den Lea-Artibaiko Ekintzaile Egunaren baitan antolatuko dituzten ekimenekin batera. Data hori mantentzea erabaki duten arren, momentu honetan COVID-19a dela eta, bizi den egoera aldakorra kontutan hartuta, Lea-Artibaiko Ekintzaile Eguna beste egun batera pasatu ahal dela azaldu dute. “Horrela balitz, erabakia hartu bezain laster jakinaraziko da”.
Lehiaketan parte hartzeko interesa duten guztiek izena emateko orria eta lehiaketaren oinarriak eskuragarri dituzte Azaro Fundazioaren eta Leartibai Garapen Agentzia-Behargintzaren webguneetan.
