Sarek eta Etxeratek bariku honetan sareetan argazki eta bideo aldarrikatzaileak zabaltzeko dei egin dute
Etxetik Etxera' saio berezia prestatu dute. Sare Herritarraren Facebook-ean ordu erdiko saioa emitituko dute bariku arratsaldean, zuzeneko musika emanaldiekin eta bertsoekin girotuta.
Etxerat Elkarteak eta Sare Herritarrak Etxetik Etxera saio berezia prestatu dute bariku honetarako [martxoak 27].
19:00etatik aurrera, Sare Herritarraren facebook orrialdean eta Hamaika Telebistan ordu erdiko saioa emitituko dute. Iragarri dutenez, Etxerat Elkartearen eta Sareren mezuak ez ohiko eran entzungo dira, saioa ikus-entzunezkoekin eta bertsolarien eta musikarien zuzeneko emanaldiekin osatuko baitute. Etxerat Elkartearen sare sozialetan ere emanaldiaren berri emango dutela esan dute.
19:30etatik aurrera, berriz, herritarren txanda izango da. Aldarrikapenenez betetako argazkiak edo bideoak atera eta sare sozialetara igotzeko deia egin dute. Irudiak #EtxeanNahiDitugu eta #NiEtxeanGeratukoNaiz traolak lagunduta zabaltzeko eskatu dute.
“Barikuan Koronabirusa dela eta ehundaka herritarrek ezingo dute preso diren beren senideak bisitatzera joan. Pairatzen dugun emergentzia egoera honen ondorioz, gure senideekiko bisita eta komunikazioen etendura mantentzen den heinean, elkartasunari eta aldarriei lekua egin nahi diegu. Egoera honek dakarren hotza apur bat goxatzen laguntzeko, batu gaitezen sarean eta zabal dezagun lau haizetara gure aldarria! Horretarako, hartu orri bat, idatzi zure aldarrikapen mezua, atera argazkia bat etxean, eta zabaldu sare sozialetan #EtxeanNahiDitugu eta #NiEtxeanGeratukoNaiz traolak erabiliz. Bilaka dezagun sarea elkartasun eta aldarrien topaleku”, adierazi dute.
https://www.facebook.com/sareherritarraEH/videos/2592706980839400/?__tn__=%2Cd%2CP-R&eid=ARBcv-7GcLRkl8WVEOCZHeTX2U8vu39pSn806GESGyBvKp4rM9V8iGV2eZwGS4KSN27RN8aGIZSWhVd0
