Lea-Artibaiko merkatari, ostalari eta zerbitzu enpresei laguntza eskaintzen ari da Leartibai Garapen Agentzia
Zalantzak argitu eta ateratzen ari diren diru laguntzen informazio eguneratua eskaintzen dute.
Koronabisurak eragindako egoera ekonomiko ezegonkor honetan lagungarri izateko zerbitzu pertsonalizatua eskaintzen dabil Leartibai Garapen Agentzia. Egoerari aurre egiten laguntzeko Lea-Artibaiko merkatari, ostalari eta zerbitzu enpresei laguntza pertsonalizatua eskaintzen ari da. Zalantzak argitu eta ateratzen ari diren diru laguntzen informazio eguneratua eskaintzeaz gain, laguntzak horrek bideratzeko zerbitzua ere ematen du.
Azaldu dutenez, gobernu erakunde desberdinak egunero ematen ari diren informazio eta diru laguntza eskaintzak “nahaste handia” sortzen ari dira: “Enpresa txiki eta ertainak egoera honen erdian aurkitzen dira eta Leartibai Garapen Agentziak zalantza horrek argitu eta diru laguntzen informazioa emateko zerbitzu berezia abiarazi du. Halaber, eskualdeko autonomo eta ETEen egungo egoera zein den ezagutzeko galdetegi bat bidali zaie eta jasotako erantzunak kontutan hartuz elkarlanean arazo honi irtenbide bateratu eta zehatz bat ematea du helburu agentziak”.
Hori dela eta, edozein zalantza argitzeko, agentziagaz harremanetan jartzeko deia egiten diete Lea-Artibai eskualdeko merkataritza, ostalari eta zerbitzu enpresa txiki eta ertainei, eta autonomoei, “informazioa eskuratu, aholkularitza jaso, diru-laguntza ezberdinen tramitazioan lagundu eta jarraipena egiteko”.
“Eta gero zer” galdera egun hauetan oso presente dagoela esan dute Leartibai Garapen Agentziakoek. Horregatik, ateratzen ari diren informazio eta laguntzen informazio gaurkotua eskaintzeaz gain, koronabirusaren krisi hau bukatzen denean zer egin hausnartzen ari dira. “Kontsumoa berpizteko neurriak hartu beharko dira. Zer egin eta zelako neurriak hartu hartu daitezkeen aztertzen ari gara eskualdeko udal, erakunde eta eragileekin elkarlanean”.
Harremanetarako. Leartibai Garapen Agentziagaz kontaktuan jartzeko bide ezberdinak dituzte zabalik. Alde batetik, Leartibai Garapen Agentziak informazio eguneratua eskaintzen du bere webgunean eta Facebook, Twitter eta Instagram sare sozialetan. 94-616 90 88 telefono zenbakira ere deitu daiteke eta helbide elektronikoak ere aktibo dituzte kontsultak egiteko: turismo enpresentzat turismo@leartibai.com ; merkatari eta zerbitzu enpresentzat merkataritza@leartibai.com eta gainerakoak leartibai@leartibai.com.
