Elikagaien Bankuek lanean jarraitzen dute familia bat bera ere janari barik ez geratzeko
Aurrekaririk gabeko krisi baten aurrean egon arren, haurrei eta gosea duten familiei laguntzeko lana ezin dela gelditu diote Elikagaien Bankuetako boluntarioek. Horrela, banaketak mantentzeaz gain, banaketa bereziak ere egiten ari dira herri batzuetan.
Koronabirusaren pandemiaren aurrean ere gosearen aurkako borrokan jarraitzen dute lanean Elikagaien Bankuek, eta, momentu honetan, gainera, harremanetan daude, etengabe, Gurutze Gorria bezalako ongintzako erakunde, boluntario talde eta udalekin, behar handiena daukaten norbanako eta familiei, behintzat, jatekorik falta ez izateko. Azken garai honetan, aurrekaririk gabeko krisi baten aurrean egon arren, haurrei eta gosea duten familiei laguntzeko lana ezin dela gelditu diote.
Joan den astean egin zuten banaketa Markina-Xemeinen. Zortzi bat lagun aritzen dira besteetan banaketa egiten. Oraingoan, baina, hiru lagunen artean egin dute. Distantziak eta segurtasuna mantentzeko, gainera, egun bakarrean barik hiru egunetan banatu dituzte elikagaiak. Premia duten familiak gehitu direla ikusi dute. «15 lagun gehiago etorri dira prestatzen ditugun janari txorten bila». 67 familiari banatzen diete janaria momentu honetan.

Amandarri Triatloi Taldeak 500 euroko laguntza eman dio Lekeitioko Elikagaien Bankuari. Marisol Iturraspe Lekeitioko Elikagaien Bankuko arduraduna eta Lourdes Antonio Amandarri TT-ko kidea. Argazkia: Marisol Iturraspe
Martxoaren 14an egin zuten azken banaketa Lekeition. Egoerak okerrera egin duela azaldu du Marisol Iturraspe Lekeitioko Elikagaien Bankuko arduradunak. «Umeek lehen eskoletan jaten zuten, eta bertan egiten zuten otordurik garrantzitsuena. Orain, berriz, umeak etxean jaten ari dira, eta lehen baino janari gehiago behar dute familiek. Umeak etxean egonda, gainera, barazkiak eta fruta ere erosi beharrean aurkitu gara”. Azken hilabetean, gehiago izan dira Lekeitioko Elikagaien Bankura joan behar izan duten familiak, «7 edo 8 gehiago». Guztira, 76 bat familia laguntzen ari dira. Horrela, hilabete honetako kamioia etorri bitartean, Gurutze Gorria, herriko boluntarioen sarea eta Lekeitioko Udala ere lan horretan ari direla azaldu du. Bestalde, opari eder bat ere jaso dute herriko Amandarri Triatloi Taldearen eskutik. Taldeak 500 euroko diru laguntza eman dio herriko Elikagaien Bankuari, eta laguntza hori guztiz eskertuta hartu dute.
Banaketa berezia egin diete adin txikikoak dituzten Ondarroako eta Berriatuko beharrizan berezidun familiei
Martxoaren 30ean egin zuten hileroko banaketa Ondarroako Danonartin elkarteak, Ondarroako eta Berriatuko udalen laguntzagaz. Horrez gain, banaketa berezi bat ere egin dute adin-txikikoak dituzten beharrizan berezidun familien artean. Umeak orain, eskola barik etxean daudela eta, premia gehiago dituzte familiek, eta adin txikikoak tartean daudela kontuan hartuta, janari freskoa ere sartu dute banaketa kutxetan, oilaskoa, esate baterako. Esan dutenez, banaketak ez du etenik izango, eta apirilaren azken astelehenean egingo dute hileroko ohiko banaketa. 62 unitate familiar laguntzen dituzte. Bestalde, Danonartin elkartekoek La Caixa Fundazioak emandako laguntza eskertu nahi izan dute.
Mutrikuko banaketak ere bere horretan jarraituko du; apirilaren 16an egingo dute banaketa «betiko orduan eta betiko lekuan». Beti bezala, udaleko Ongizate Zerbitzutik jaso dute banaketarako zerrenda, eta oraingoan 33 familia unitateri egingo diete banaketa.