Munitibarko Udalak segurtasun protokoloak zehaztu eta argitaratu ditu
Protokoloak deskonfinamendu faseetara egokituko dituzte. Maiatzaren 11tik aurrera, arreta telematikoa hobetsiko badute ere, aurrez aurreko zerbitzua emango dute udaletxean, eta frontoia bakarka erabili ahalko dute udalerrian erroldatutakoek eta Lea Ibarra Motrollo pilota eskolako federatuek.
Herritarrentzako baliagarriak izango diren protokolo hauetan gomendioak eta informazio orokorra emateaz gain, udaletxean eta gune publikoetan hartu beharreko segurtasun neurriak eta informazioa jaso dituzte. Protokolo hauek deskonfinamendu fase desberdinetan egokitzen joango direla azaldu dute udal gobernuaren ordezkariek, eta kaleratu duten dokumentua etxez etxe banatuko dute. Besteak beste, higiene eta segurtasun arauak, maskarillen erabilera egokiari buruzko azalpenak eta COVID 19-ak material zehatzetan irauten duen denbora jaso dituzte.
Maiatzaren 11ra arte [astelehena], udalean arreta telematikoa ematen ari dira, ohiko ordutegian (94 616 40 07 edo administrazioa@munitibar.org). Maiatzaren 11tik aurrera, arreta telematikoa hobetsiko badute ere, aurrez aurreko zerbitzua ere eskainiko dute udaletxean, 10:00etatik 13:00ak arte. Herritarrei zerbitzu hori emateko, horiek udaletxera sartzean eta irtetzean eskuak garbitu ditzaten xaboia jarriko dute sarreran.
Momentuz, ez dute liburutegia zabalduko, baina, gogora ekarri dute aurretiaz liburuak eskatuz gero, bertan jasotzeko aukera daukala jendeak, eta erabilitako liburuek berrogeialdia pasatu beharko dutela. liburutegia@munitibar.org helbide elektronikora idatzita edo 94-616 57 28 (liburutegia) eta 94 616 40 07 (administrazioa) telefono zenbakietara deituta egin daitezke liburuen eskariak.
Kirol instalazioei buruzko zehaztasun eta protokoloak ere jaso dituzte. Frontoia maiatzaren 11an, astelehenean, zabalduko dute (deskonfinamenduko 1. fasetik aurrera). Baina, bakarka erabili ahalko dute herritarrek, eta deskonfinamenduaren 2. fasean (maiatzaren 25etik aurrera, dena ondo badoa) taldean erabiltzen hasi ahalko dira. Momentuz, baina, ezingo du edonork bertara sartu: “Munitibarren erroldatuek eta Lea Ibarra Motrollo pilota eskolako federatuek bakarrik erabili ahal izango dute frontoia alarma egoera luzatzen den bitartean”.
Frontoia erabiltzeko aurretiaz txanda eskatzea ezinbestekoa izango da (94 616 40 07 edo administrazioa@munitibar.org) Udaletxeko ohiko ordutegian egin behar dira eskariak, eta gomendatu dute erreserba aurreko lanegunean egitea. Giltza udaletxean hartu eta bueltatu beharko dute erabiltzaileek.
“Txandak 50 minutukoak izango dira. Frontoia txanda hasi eta 55 minutura utzi beharko da. Frontoia 50 minutuz erabili ostean, erabiltzaileak gune zehatz batzuen desinfekzioa burutzeko 5 minutu izango ditu, ateetako heldulekuak eta gauzak uzteko egokitutako tokia, adibidez. Agindutako denborak edo segurtasun neurriak (frontoia banaka erabiltzea) ez direla betetzen susmatzen bada edo kexaren bat jasotzen bada, ez da erreserba berririk egiteko aukerarik egongo emergentzia egoera luzatzen den bitartean”, azaldu dute. Desinfekziorako spray eta paperezko zapia udalak hornituko ditu, eta aldagelak ezingo dira erabili.
Bestalde, gimnasioa itxita mantenduko dute, baina, kanpoko gimnasioa erabilgarri egongo da, mantendu beharreko segurtasuneko distantzia errespetatuta. Erabili aurretik eta ondoren eskuak garbitzeko eskatu diete herritarrei.
