Herriko tabernen aldeko elkartasun dinamikak abiarazi dituzte
Banaka, binaka edo familia osoagaz argazkia atera eta sare sozialak elkartasunez betetea dute helburu Lekeition. Ondarroan eta Mutrikun, bestalde, argazki zaharrak jasotzen ari dira.
Espainiako Auzitegi Nazionala herriko tabernen auziko sententzia (35/02 sumarioko epaia) gauzatzen hasi zen joan den hilean, haien kontu korronteak enbargatzeko agindua emanda. Lea-Artibai eta Mutrikuren kasuan, Lekeitio, Ondarroa, Markina-Xemein eta Mutrikuko herriko tabernak daude sumario horren barruan, eta Lekeitioko Galarrenan eta Ondarroako Uxola elkarteko kontuetan esku hartu du Auzitegi Nazionalak.
“Eraso” berri horren aurrean, herrikoen aldeko babes kanpainak abiarazi dituzte hainbat herritan. #GalarrenaGara lelopean, esate baterako, elkartasun dinamika bat jarri dute martxan Lekeition. Banaka, binaka edo familia osoagaz argazkia atera eta sare sozialak elkartasunez betetea dute helburu. Argazkiak galarrenake@gmail.com helbidera bidali daitezke edo sare sozialetara –Instagram edo Facebook– igo #GalarrenaGara traola jarrita.
Galarrena herriarena dela azpimarratu dute, eta beraz, “Galarrenaren kontrako erasoa Lekeitio osoaren kontrako erasoa” dela esan dute: ” Bere buruaren jabe eta aske izan nahi daben herri baten kontrako erasoa. Galarrena ez da eraikin huts bat, Lekeitio osoan dabilen haize fresko eta eraldatzailea da. Beste eredu bateko Lekeitio eraikitzen gabiltzanon haize bultzada”.
Hala ere, orain dela bost urte, Espainiako Auzitegi Nazionalak herriko tabernen auzian emandako epaia berretsi zuenean aurrera egiteko hautua hartu zutela gogora ekarri dute, “Lekeitiori ekarpen politiko-kultural desberdina egiten jarraituz”, eta orain ere, elkartasun aldarria zabaldu eta aurrera jarraitzeko asmoa da nagusitu dena.
Herrikoak herrikoarenak egitasmoaren barruan, Ondarroako Txokoari babesa emateko nahiagaz Txokoan ateratako argazkiak jasotzen hasi dira. “Batek baino gehiagok edukiko du Txokoan ateratako argazkiren bat. Urtebetetze jairen batean, bazkaritan, ospakizunen batean, hauteskundeetan edo pankartak egiten, besteak beste. Argazki horiek jaso nahi ditugu”. Argazkiak bi modutara jasoko dituzte: sare sozialen bidez #TxokuHerrixana traola erabilita edo otzara@hotmail.com helbide elektronikora bidalita.
Mutrikun, berriz, bestelako ekimenak egin dituzte. Aurreko astean, esaterako, herritarrek Zubixan bizi izandako bizipenak edo Zubixagatik sentitzen dutena jasotzen ibili ziren; ekimenean parte hartu zutenek bizipenak eta sentimendu horiek paper itsasgarrietan idatzi, eta herriko tabernaren atean itsatsi zituzten. Aldi berean, jendeari Zubixan ateratako argazkiak bidaltzeko eskatu diete. “Ekimenak erantzun oso ona eduki du. Jaso ditugun argazki horiekin bideo bat egingo dugu”.
