Bizkaiko Jubilatuen Elkarteak COVID-19ari aurre egiteko neurri gehiago hartzeko eskatu die agintari politikoei
Besteak beste, herritar guztiek erabiltzen dituzten guneetan ere maskaren erabilera derrigorrezkoa izatea eskatzen dute. Eskaerak Lehendakariari eta Bizkaiko Ahaldun Nagusiari helarazi dizkie.
“Pozten gara garraio publikoan maskarak nahitaez erabiltzeko eskatu izanagatik, baina gure ustez ez da nahikoa”, adierazi dute Nagusiak Bizkaiko Jubilatuen Elkarteko kideek. Kutsatuta dauden baina asintomatikoak direnen kopurua ezin denez jakin, herritar guztiek erabiltzen dituzten guneetan ere maskaren erabilera derrigorrezkoa izatea eskatzen dute. Eskaera hori Lehendakariari eta Bizkaiko Ahaldun Nagusiari bideratu diote. “Lehendakaria Araba, Bizkai eta Gipuzkoako arduradun gorena delako, eta Bizkaiko Ahaldun Nagusiak Bizkaiko egoitzen eskumena duelako”.
Elkarteak Bizkaian 50.000 bazkide baino gehiago dituela gogorarazi dute. “Gure bazkideengana jo dugu egoeraren diagnostikoa eta ebaluazioa egiteko eta horren aurrean berehalako ekintzak proposatzeko”. Izan ere, koronabirusaren pandemia “izugarrizko ezbeharra” izan dela eta euren kolektiboan sortu duen hilkortasuna “onartezina” izan dela diote.
Gaineratu dute, pertsona nagusientzako Bizkaian dauden 155 establezimenduetan (egoitza publikoak, itunpekoak zein pribatuak) 10.500 egoiliar baino gehiago bizi zirela eta horietan heriotza asko erregistratu direla; “penagarria izan da”. Eta azpimarratu dute, hil diren horiek “gehienetan bakardadean joan direla”. Egoera oraindik ere ez dela amaitu diote, eta horregatik neurri gehiago hartzeko eskatu diete agintariei.
Hain justu, heriotza gehiago eragozteko hartutako neurri guztiak ongietorriak izango direla diote. “Heriotzak gelaraztea eskatzen dugu, baina, bereziki, osasun langileena, pertsona zaurgarriena eta adinekoena”.
