Ondarroako Arrrigorri hondartza eskularruz beteta dagoela salatu dute
Herritar batek WhatsApp bidez zabaldutako bideoan ikusi daitekeenez, Arrigorri hondartzan eskularru asko eta asko agertu dira, eta horren salaketa egin nahi izan du.
Bideoa ezagutzera eman orduko, hautsak harrotu ditu han-hemenka. Eguzkik, esaterako, egoera salatu nahi izan du. “Auskalo zenbat material sanitario dagoen gure itsaso eta erreketan”, azpimarratu dute. Talde ekologistako kideek gaineratu dutenez, egunotan euri asko egin du eta, euren ustez, horregatik agertu da hainbat material hondartzan.
Eguzkik hausnarketarako deia egin du, eta herritarrei arduraz jokatzeko eskatu diete. Bide batez, inguruko udalerrietako arduradunei ere eskua sartzeko eta laguntzeko eskatu diete. “Herritarrei euren zaborrekin arduratzeko deialdi berezia egitea beharrezkoa dela uste dugu; batez ere egunotan bizi dugun egoeran”.
