Aurtengo udan ere, aparkaleku zerbitzua edukiko dute lekeitiarrek
Osasun alarma dela eta, gune berririk ezin dutela zabaldu jakitera eman dute; beraz, iaz bezala, 6 gune egongo dira.
Ekainaren 15etik irailaren 15era bitartean, herritarrentzako prestatutako aparkaleku zerbitzua jarriko du martxan Lekeitioko Udalak. Urtero modura, udaldian Lekeitiotik kanpo lan egiten duten herritarrek herrira bueltatzean euren autoa aparkatzeko aukera gehiago izatea du helburu egitasmoak.
Osasun alarma dela eta, gune berririk ezin dutela zabaldu jakitera eman dute, beraz, iaz bezala, 6 gune egongo dira. Denetara, 553 aparkaleku edukiko dituzte eskura herritarrek.
Argitu dutenez, COVID-19ak sortutako egoera dela eta, iazko pegatina daukaten autoak baimenduta egongo dira, aurten ere, eta ez dute izena eman beharko. “Aurreko urteetan zerbitzuaren erabiltzaileak izan direnak baina pegatinarik ez dutenak eta alta berriek, berriz, baimen pegatina eskatu beharko dute”. Txartela lortzeko udaltzaingora joan behar da, maiatzaren 25etik aurrera, ondorengo ordutegian: astelehenetik barikura, 09:00etatik 14:00etara. Horrez gain, mezu bat ere bidali daiteke, eskaera eginez, bertakoak@lekeitio.eus helbide elektronikora. Txartel berriak 2020-2021 denboraldirako izango dira eta 3 euroko prezioa izango dute.
Lekeitioko bizilagunetatik gain, herrian enpresa bat dutenek edota berton lan egiten dutenek ere aparkaleku zerbitzuaren onuradun izateko txartela eskatu ahalko dute. Eskaerak egiteko epea eta lekua aste honetan zehaztu eta jakitera emango du udalak.
Hauek izango dira guneak:
- Paskual Abaroa etorbidea 26-bisetik Talara, eta San Juan Talako.
- San Andres, Eusebio Maria de Azkue, Piedade, San Bixente Ferrer eta Basoaldea.
- Zumatzeta, Buenaventura Zapirain, Otxoa de Urkiza eta Agirre Solarte 1etik 17ra.
- Aldamiz Etxebarria 22, 24 eta 26 eta Letraukua 8 eta 9.
- San Antolin eta Carlos Solano kaleak osorik.
- Txatxo Kaia kalean plaza eta portuaren arteko gunea.
