Balkoietatik zabaldu dute musika Markina-Xemeingo artistek
40 musikari eta musikazalek parte hartu dute Uhagon kulturguneak prestatutako emanaldian.
Uhagon kulturgunearen eskutik, herriko musikari eta musikazaleak etxebizitzetako leiho eta balkoietara irten ziren zapatu [maiatzak 16] arratsaldean herritarrei doinu ederrak helarazteko. Musika estilo ezberdinekin alaitu zuten Markina-Xemein.
Txiki, gazte eta heldu, 40 bat musikarik parte hartu zuten ekimenean, eta herriko auzo gehienek eduki zuten musikaz gozatzeko aukera. Txalo zaparradekin eskertu zituzten musikarien inguruetako bizilagunek emanaldiak.
Uhagon kulturgunekoak pozik geratu dira emanaldiagaz: “Musika presente egotea zen gure asmoa , eta lortu dugu. Ekimen polita, parte hartzailea eta anitza izan da. Adin eta estilo ezberdinetako jendea batu du”. Parte hartzaileek erakutsitako gogoa eta ahalegina eskertu dute. “Aurten instrumentua jotzen ikasten hasi direnak ere parte hartu dute, eta ahalegin hori asko eskertzen da. Badakigu, gainera, beste batzuk ere parte hartzeko gogoa zeukatela, baina arrazoi bat edo beste ezin izan dutela egin, horiei ere gure esker ona erakutsi nahi diegu eta musikagaz jarraitzera animatzen ditugu”.
Ekimenaren argazkiak zabaldu dituzte, eta parte hartzaile guztien emanaldiekin muntaia bat egiteko asmoa daukatela aurreratu dute. “Balkoi eta leihoetan jo dutenez, inguruko bizilagunek gozatu ahal izan dute bakarrik, eta herritar denei zabaldu nahi diegu aukera hori”.
